Reseıdegi karantın aqtóbelik sharýalarǵa keri áserin tıgizýde
AQTÓBE. QazAqparat - Aqtóbelik sharýalar asyl tuqymdy iri qara malyn shekaradan ótkize almaı otyr, dep habarlaıdy QazAqparat tilshisi.
Aqtóbede óńirlik kásipkerlik palatasynda kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńes otyrysy ótti.
Jıyn kezinde Reseı Federatsııasynyń shekaralyq aımaqtarynan asyl tuqymdy mal ákelýge tyıym salýy máselesi qaraldy.
Osy jyldyń shilde aıynda QRAýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti Reseı Federatsııasynyń birqatar oblystarynan, onyń ishinde Orynbor, Saratov, Samara, Qorǵan, Chelıabi qalalarynan ákelinetin iri qara jáne basqa janýarlardy nodýlıarly dermatıt jáne aýsyl aýrýlaryna beıimdigi baıqalýyna baılanysty iri qara maldy shekaradan ótkizýge shekteý qoıǵan edi.
Alaıda búgingi jıynda Aqtóbe oblysynyń kásipkerler palatasyna «Abylaı», «RýsArt», «Tileý», «Bolat LTD» JShS sekildi sharýa qojalyqtary ótinish aıtyp, Reseıden asyl tuqymdy mal ákelýge tyıym salý máselesin sheshýdi surady.
«Ótinish aıtqan sharýalar karantınniń kesirinen jabylyp qalýy múmkin. Al «Sybaǵa» baǵdarlamasy aıasynda sharýalardyń asyl tuqymdy mal alýy úshin «Aýyl sharýashylyǵyn qarjylaı qoldaý qory» AQ-nyń Aqtóbe fılıalyna 1,2 mıllıard teńge turatyn 2421 bas iri qara mal satyp alýǵa ótinish tústi. Qazirgi kezde 41 sharýashylyqtyń 1828 bas iri qara mal satyp alýyna nesıe berildi», - dedi Aqtóbe oblysy Kásipkerler palatasy kásipkerlerdiń quqyqtaryn qorǵaý jónindegi keńesiniń tóraǵasy Esimhan Qurmanǵazın.
Onyń aýtýynsha, «Alǵa-Eskendir» sharýa qojalyǵy 40 mıllıon teńge nesıe alyp, 15 shildede Samara oblysyndaǵy «Polıanskoe» asyl tuqymdy mal sharýashylyǵymen kelisimshartqa qol qoıǵan. Al 19 shildedegi tyıym jospardy buzyp, qazir «Polıanskoe» sharýa qojalyǵy aldyn ala tólemdi qaıtarmaı otyr. Sebebi, kelisimsharttyń buzylýyna olarkináli emes kórinedi.
Óz kezeginde kásipkerler nesıe qarajatyn ıgerý merzimin uzartýdy nemese Reseıdiń karantınge jabylmaǵan aýdandarynan mal ákelýge ruqsat berýdi surady.
Aqtóbe oblystyq kásipkerler palatasy Ulttyq palataǵa osy másele boıynsha usynys berdi.
