Reseıdegi halyqaralyq baıqaýda qazaqstandyq jas mýzykant bas júldeni jeńip aldy
ALMATY. Sáýirdiń 8-i. QazAqparat /Erlik Erjanuly/ - Reseıdiń Novokýznetsk qalasynda ótken jas mýzykanttar arasyndaǵy halyqaralyq baıqaýda A. Jubanov atyndaǵy daryndy balalarǵa arnalǵan qazaq orta mamandandyrylǵan mýzyka mektep-ınternatynyń oqýshysy bas júldeni jeńip aldy,
dep habarlaıdy QazAqparat.
Bıyl tuńǵysh ret ótip otyrǵan bul saıys TMD elderindegi mýzyka mektepteriniń talantty ımprovızatorlary men kompozıtorlary arasynda ótti. 14-pen 18 jas aralyǵyndaǵy jas mýzykanttary arasyndaǵy bul baıqaýdyń basty ereksheligi - onda úmitkerler daıyn mýzykany emes, óz ónerlerin ortaǵa saldy. Oǵan Ahmet Jubanov atyndaǵy óner ordasynan úsh oqýshy qatysty. Tartysty ótken óner saıysynda 60-qa jýyq talapkerdiń arasynan 12-shy synyp oqýshysy Nurasyl Nýrıdın «Kompozıtsııa» jáne «Improvızatsııa» atalymdary boıynsha eki birdeı bas báıgeni oljalady. Al 11-shi synyp oqýshysy Qaırat Tursynbekov «Improvızatsııa» atylymynda 3-shi oryn alsa, 10-shy synyp oqýshysy Darhan Tóleev dıplomant atanyp qaıtty.
