Reseıdegi geosaıası oqıǵalar Qazaqstanǵa qalaı áser etti – Premer-Mınıstr
«Eń birinshiden, Reseı bizdiń úlken kórshi memleket, bizdiń saýda-ekonomıkalyq seriktesimiz. Sondyqtan biz bul memleketpen ári qaraı yntymaqtastyqty ulǵaıtamyz. Bizde Reseımen tarıhı jáne saýda-ekonomıkalyq baılanystarymyz óte tyǵyz. Reseıde bolǵan ártúrli jaǵdaı árıne, bizge óziniń áserin tıgizedi. Mysaly, bıylǵy jyldyń basynda geosaıası oqıǵalar boldy. Bul máseleler bizge tikeleı áserin tıgizip jatyr. Sondyqtan biz tıisti daǵdarysqa qarsy is sharalar keshenin qabyldadyq», - dedi Úkimet basshysy Ulttyq arnadaǵy «Jańa Qazaqstan» baǵdarlamasynda.
Premerdiń aıtýynsha, Qazaqstannyń jyl sońyna deıingi naqty is-sharalary bar. Ol júıeli jáne jedel sharalar.
«Mysaly Ulttyq bankpen birlesken sharalar sheńberinde biz teńgeniń aıyrbas baǵamyn turaqtandyrý boıynsha birqatar sheshim qabyldadyq. Mysaly teńgelik depozıtterdi qoldaý, memleketten shetel valıýtasyn shyǵarýǵa shekteý qoıý, sonyń arqasynda qazir ózderińiz kórip otyrsyzdar, teńgeniń aıyrbas baǵamy salystyrmaly túrde turaqty bolyp otyr. Inflıatsııaǵa qarsy keshendi sharalar josparyn qabyldadyq. Qazir ınflıatsııa barlyq jerde baıqalyp otyr. Degenmen biz kúndelikti monıtorıng júrgizip, tıisti sharalardy qabyldap jatyrmyz», - dedi Á. Smaıylov.
Sonymen birge, Premer-Mınıstrdiń aıtýynsha, saýda-sattyqqa baılanysty logıstıkalyq máseleler týyndap jatyr.
«Sońǵy bir mysal – KQK munaı qubyry boıynsha Novorosıısktegi aýdandyq sot 5 shilde kúni KQK jumysyna bir aıǵa shekteý qoıdy. 6 shilde kúni biz reseılik áriptesimiz – úkimet tóraǵasymen baılanysyp, sol kúni máseleni sheshtik. KTK qubyrynyń jumysy shtattyq rejımde júrip jatyr. Munaı eksportyna eshqandaı shekteý qoıylǵan joq. Sondaı máseleler kúndelikti týyndaıdy, biz bul máselelerdi sheshý úshin kórshiles elderdiń úkimet basshylarymen tyǵyz baılanystamyz, kúndelikti problemalardy jedel túrde sheshýge shara qabyldaýdamyz. Bul – jedel sharalar», - dedi QR Premer-Mınıstri.
Foto: primeminister.kz
