Reseıdegi týrnırde bokstan áıelder quramasy altyn júldesiz qaldy

ASTANA. KAZINFORM — Reseıdiń Habarovsk qalasynda ótip jatqan bokstan Konstantın Korotkovty eske alýǵa arnalǵan týrnırde áıelder quramasy altyn júldesiz aıaqtady. 

El quramasynan áıelder arasynda qazaqstandyq úsh bylǵary qolǵap sheberi fınalda baq synaǵan edi. Olardyń úsheýi de qarsylastaryna ese jiberip, týrnırdiń kúmis medalin qanaǵat tutty.

Fınalda Aıdana Zabynbekova (57 keli) Soltústik Koreıadan kelgen Sok Hen Ký, Uldana Taýbaı (66 keli) sol eldiń taǵy bir ókili Sý He Hoangqa 0:5 esebimen ese jiberdi.
Al Rımma Volosenko (60 keli) reseılik Irına Avtınadan 2:3 esebimen jeńilip qalǵan edi.

Endi erler quramasynan Sáken Bıbosynov (54 keli) reseılik Denıs Palshın, Saǵyndyq Toǵambaı (92 keli) Sergeı Slobodıan, Nurlan Saparbaı (92 keliden joǵary) reseılik Orýdj Mamedovpen qolǵap túıistiredi.

Aıta ketsek, halyqaralyq týrnır bıyl on altynshy márte uıymdastyrylyp otyr. Baıraqty báseke 20 sáýirge deıin jalǵasady.

Eske salsaq, budan buryn atalǵan týrnırde Sáken Bıbosynov (54 keli) fınalǵa joldama aldy.