Reseıdegi tótenshe jaǵdaıdan qaza tapqandar sany 23 adamǵa jetti

MÁSKEÝ. KAZINFORM — Reseı TJM málimetinshe, Rıazan oblysynyń Shılov aýdanyndaǵy kásiporynda bolǵan jarylys saldarynan qaza tapqandardyń sany 23 adamǵa ósti.

Habarlamada qutqarýshylar úıindi astynan taǵy eki adamnyń máıitin tapqany, al jaraqat alǵandardyń biri aýrýhanada kóz jumǵany aıtylǵan.

Eske sala keteıik, aǵymdaǵy jyldyń 15 tamyzynda shamamen 10:30–da (Máskeý ýaqytymen) Rıazan oblysy Shılov aýdanyndaǵy sıntetıkalyq talshyqtar óndiretin «Elastık» zaýytynyń oq-dári tsehynda órt shyǵyp, sonyń saldarynan jarylys bolǵan.

Óńir bıligi tótenshe jaǵdaıdyń zardaptaryn joıý úshin arnaıy shtab qurdy. Aǵymdaǵy jyldyń 18 tamyzy Rıazan oblysynda qaza tapqandardy aza alý kúni bolyp jarııalandy.

Rıazan oblysynyń gýbernatory Pavel Malkovtyń aıtýynsha, qaza tapqandardyń otbasylaryna 1 mln 567 myń rýblden, al zardap shekkenderge 627 myń rýblge deıin ótemaqy tólenetin bolady.

Buǵan deıin Rıazan mańyndaǵy zaýytta úıindi astynda qalǵan 11 adam qaza tapqanyn jazǵanbyz.