Reseıdegi terakt kezinde 15 jastaǵy mektep oqýshysy júzden astam adamdy qutqardy

ASTANA. KAZINFORM —Máskeýdiń Krasnogorsk qalasyndaǵy «Krokýs sıtı holda» bolǵan terakt kezinde 15 jastaǵy mektep oqýshysy H.Islam júzden astam adamdy qutqaryp qaldy, dep habarlady TASS.

Bul týraly «Komsomolskaıa pravda» gazeti habarlady.

Onyń málimetinshe, «Krokýstyń» kıim ilgishinde jumys istep, tabys tabatyn segizinshi synyp oqýshysy kontsert kezinde qarýly lańkesterdiń dál qasynda bolǵan. Islamnyń aıtýynsha, ol jarty saǵattaı adamdardyń ǵımarattan shyǵýyna kómektesken.

— Dál 23:00-de atys bastaldy. Men birden adamdardy shyǵarýǵa júgirdim. Óıtkeni qosalqy esikterdiń qaıda ornalasqanyn biletin edim. Ketip qalsam, júzdegen adam óletinin túsindim. Qolymnan kelgeninshe biraz adamdy shyǵarysyp, úıge qaıttym. Men ózimdi batyr dep sanamaımyn», - dedi Islam «Komsomolskaıa pravda» gazetine bergen suhbatynda.

Balasynyń bul áreketin estigen anasy kóz jasyn tyıa almady, dep jazady basylym.

Buǵan deıin habarlaǵanymyzdaı, keshe belgisiz bireýler Máskeýdiń Krasnogorsk túbindegi Crocus City Hall ǵımaratynda adamdarǵa oq jaýdyrdy. Bul kezde «Pıknık» tobynyń kontserti bastalýy kerek edi.

Reseı Tergeý komıteti lańkestik áreketke qatysty qylmystyq is qozǵady.

Oqıǵa ornyna máskeýlik jedel áreket etýshi jasaq men arnaıy maqsattaǵy mılıtsııa otrıady, sondaı-aq órt sóndirýshiler jiberildi. Crocus City Hall ǵımaratyna 30-dan astam oblystyq jáne 20 jedel járdem brıgadasy jiberildi.

Atys bastalǵany týraly málimetten keıin ǵımaratta órt shyqqany habarlandy.

RF Tótenshe jaǵdaılar mınıstrliginiń málimeti boıynsha, órtengen aýmaq 12 900 sharshy metrdi qurady.

Órt sóndirýshiler adamdardy shatyrdan shyǵaryp, 100-ge jýyq adamdy evakýatsııalady.

Máskeý áýejaılary men vokzaldarda qaýipsizdik sharalary kúsheıtildi. Barlyq buqaralyq is-sharalar toqtatyldy. Reseı Federatsııasynyń birneshe óńirinde tótenshe jaǵdaıǵa baılanysty qaýipsizdik sharalary kúsheıtildi.

FQQ Krokýs Sıtı Holldaǵy teraktige qatysty 11 adamnyń ustalǵanyn habarlady.

24 naýryz Reseıde ulttyq aza tutý kúni bolyp jarııalandy.

Qazaqstan azamattary úshin 8 [phone] telefony boıynsha senim telefony ashyldy. QR Syrtqy ister mınıstrligi Reseıdegi teraktide qaza tapqandar men zardap shekkender arasynda qazaqstandyqtar týraly aqparat joq ekenin habarlady.

Prezıdent Qasym-Jomart Toqaev Qazaqstan Máskeýde beıbit turǵyndarǵa qarsy jasalǵan lańkestik áreketti qatań aıyptaıtynyn aıtty. EO ókilderi de Reseıdegi lańkestik áreketke jaýap berip, beıbit turǵyndarǵa jasalǵan kez kelgen shabýyldy aıyptady.

Qasym-Jomart Toqaev Vladımır Pýtınmen telefon arqyly sóılesti. Áńgimelesý barysynda Memleket basshysy Qasym-Jomart Toqaev barsha qazaqstandyqtardyń atynan Prezıdent Vladımır Pýtınge jáne baýyrlas Reseı halqyna Máskeý oblysyndaǵy lańkestik árekettiń saldarynan kóptegen adamnyń qurban bolýyna baılanysty kóńil aıtty.

Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń jedel otyrysy ótti. Máskeý oblysyndaǵy beıbit turǵyndarǵa jasalǵan qatygezdik zorlyq-zombylyq áreketin taǵy da aıyptaı otyryp, Memleket basshysy terrorızmge qarsy kúreste Qazaqstannyń Reseımen yntymaqtastyǵyn qýattady.

Memleket basshysy el azamattarynyń qaýipsizdigin qamtamasyz etý jáne terrorızmge qarsy turý maqsatynda Qazaqstannyń basqa memlekettermen jáne halyqaralyq uıymdarmen ózara is-qımylyn qamtamasyz etý jónindegi sharalardy kúsheıtýge baǵyttalǵan tapsyrmalar berdi.