Reseıdegi pasterellez: Qazaqstanda barlyq mal vaktsınalanady
ASTANA. KAZINFORM — Reseıde pasterellez aýrýynyń taraýyna baılanysty Qazaqstannyń Aýyl sharýashylyǵy mınıstrligi veterınarlyq qorǵaýdy kúsheıtti. Bul týraly Premer-mınıstrdiń orynbasary Qanat Bozymbaev aıtyp berdi.
— Ótken aptada ǵana Aýyl sharýashylyǵy mınıstrligi boıynsha tıisti preparattardy shuǵyl túrde satyp alý týraly qaýlyǵa daýys berdik jáne barlyq mal tolyǵymen vaktsınalanady. Ásirese shekara mańyndaǵy eldi mekenderde veterınarlyq qorǵaý kúsheıtildi. Sondyqtan qazir Aýyl sharýashylyǵy mınıstrligi bul másele boıynsha óte belsendi jumys júrgizip jatyr, — dep jaýap berdi Q. Bozymbaev Úkimet úıinde ótken brıfıngte.
Spıkerdiń aıtýynsha, ázirge Qazaqstanda eleýli faktiler anyqtalǵan joq.
Aıta keteıik, Reseıdiń birqatar óńirinde pasterellez tarap, epızootııalyq jaǵdaı nasharlap jatyr. Osy oraıda Qazaqstan veterınarlyq qadaǵalaý sharalaryn kúsheıtti. QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti kórshi elden tiri maldy tasymaldaýǵa, sondaı-aq termııalyq óńdeýden ótpegen et ónimderin, jemdi ákelýge jáne tranzıtteýge ýaqytsha shekteýlerdi birtindep engizdi.
