Reseıdegi musylman kýrerlerge alkogol men shoshqa etin tasymaldaýǵa tyıym salyndy
ASTANA. KAZINFORM — Reseı Federatsııasy Musylmandary Dinı Basqarmasynyń (RF MDB) Ǵulamalar keńesi musylmandardyń jetkizý jáne logıstıka salasynda kýrer bolyp jumys isteýine ruqsat berý týraly pátýa (teologııalyq úkim) shyǵardy.
RF MDB saıtynda jarııalanǵan pátýa mátinine sáıkes, musylmandarǵa anyq tyıym salynǵan zattardy tasymaldaýǵa shekteý qoıylady, sonyń ishinde:
- alkogoldik sýsyndar;
- qumar oıyndar;
- puttar men putqa tabynýshylyqtyń dinı zattary;
- shoshqa eti;
- tyıym salynǵan jolmen soıylǵan maldyń eti.
Bul ereje kádege jaratý maqsatynda jetkizilgen jaǵdaıda ǵana erekshelik retinde qarastyrylady.
Kúrdeli jaǵdaılarda júk jetkizýge ruqsat etiledi, biraq kýrerdiń mindetti túrde sadaqa berýi talap etiledi dep atap ótilgen.
— Eger júkte ruqsat etilgen jáne tyıym salynǵan zattar bolsa, biraq ruqsat etilgeni basym bolsa, onda keıin sadaqa berý shartymen jetkizýge ruqsat etiledi, — delingen mátinde.
Keńes anyq ruqsat etilgen júk túrlerine mynalardy jatqyzdy:
- tamaq ónimderi;
- ruqsat etilgen tártippen soıylǵan maldyń eti;
- jarma;
- sary maı jáne sút;
- jemister, kókónister jáne t. b.;
- azyq-túlik emes sharýashylyq taýarlary (kıim, jıhaz, ydys-aıaq, keńse taýarlary, elektronıka);
- kitaptar;
- aqparat tasymaldaýshylar;
- dárilik zattar men medıtsınalyq maqsattaǵy buıymdar.
Pátýaǵa sáıkes, júktiń qaı kategorııaǵa jatatyny belgisiz bolsa (mysaly, ol jabyq jáshikterde jetkizilse jáne jetkizýshiniń ishindegi zattar týraly málimeti bolmasa), tasymaldaýǵa ruqsat etiledi.
Saýda jáne qyzmet kórsetý salasynyń barlyq qatysýshylary sııaqty kýrerlerge de «tabystyń tazalyǵyna kúmándanatyn bolsa, tapqan tabysyn zeket arqyly tazartý» usynylǵan.
Ulttyq statıstıka bıýrosynyń málimdeýinshe, elimizde 2025 jyldyń qańtar-mamyr aralyǵynda kóretilgen poshta jáne kýrerlik qyzmet kólemi 35,4 mlrd teńgeni qurady. Bul ótken jyldyń sáıkes kezeńimen salystyrǵanda 4,1% artyq.