Reseıdegi qarttar úıi ólimge ákelgen tumaý saldarynan ýaqytsha jabyldy
ASTANA. KAZINFORM – Kalınıngrad qalasynda qart adamdarǵa arnalǵan ortalyqtyń qyzmeti 80 táýlikke toqtatyldy. Buǵan mekemede tumaý aýrýynyń tirkelýi, sonyń ishinde ólim jaǵdaıynyń oryn alýy sebep boldy, dep habarlaıdy TASS.
Kalınıngrad oblysy boıynsha sanıtarııalyq-epıdemıologııalyq baqylaý jáne tutynýshylar quqyqtaryn qorǵaý basqarmasynyń málimetinshe, «Kalınıngrad pansıonaty» JShQ-da turatyn tórt adamda tumaý deregi anyqtalǵan. Olardyń birinde aýrý medıtsınalyq kómekke júginbesten ólimmen aıaqtalǵan.
«Jaýapty mekeme osy oqıǵaǵa baılanysty epıdemıologııalyq tergeý júrgizdi. Sot “Kalınıngrad pansıonaty” JShQ-ny ákimshilik quqyq buzýshylyq jasaǵany úshin kináli dep tanyp, onyń qyzmetin 80 táýlikke ákimshilik tártippen toqtatý týraly sheshim shyǵardy», – delingen habarlamada.
Tekserý barysynda mekemede zańnama talaptarynyń buzylǵany anyqtalǵan. Atap aıtqanda, tamaq daıyndaý jumystaryna mekememen eńbek qatynasynda turmaıtyn, medıtsınalyq kitapshasy joq, jumysqa ruqsaty men vaktsınatsııadan ótkeni týraly derekteri, sondaı-aq kásibı gıgıenalyq daıarlyǵy men attestatsııasy bolmaǵan adamdar tartylǵan.
Sonymen qatar jaramdylyq merzimi 2025 jylǵy qarasha-jeltoqsan aılarynda ótip ketken et ónimderi tabylǵan. As úı men taǵam daıyndaýǵa arnalǵan qural-jabdyqtardan alynǵan shaıyndylarǵa júrgizilgen zerthanalyq tekserý jýý jáne dezınfektsııalaý talaptarynyń saqtalmaǵanyn kórsetti. Nátıjesinde ishek taıaqshasy tobyna jatatyn bakterııalar anyqtalǵan.
Kalınıngrad oblysy boıynsha sanıtarııalyq-epıdemıologııalyq baqylaý jáne tutynýshylar quqyqtaryn qorǵaý basqarmasynyń qyzmetkerleri pansıonat turǵyndaryn medıtsınalyq tekserýden ótkizip, keıbir turǵyndarda juqpaly aýrý belgilerin, onyń ishinde qyshyma derekterin tirkegen.
Qazirgi tańda juqpaly aýrý belgileri bar adamdardy jedel túrde aýrýhanaǵa jatqyzý uıymdastyrylǵan. Al qalǵan turǵyndar memlekettik áleýmettik mekemelerge kóshirilgen.
«Kalınıngrad pansıonaty» JShQ qart adamdarǵa ýaqytsha turýǵa arnalǵan oryndardy aqyly negizde usyný, gıgıenalyq jáne áleýmettik-turmystyq qyzmet kórsetý, sondaı-aq tamaqtandyrýdy uıymdastyrý qyzmetterin kórsetip kelgen.
Aıta keteıik, buǵan deıin Reseıde toǵyz náresteniń óliminen soń perzenthana jumysyn toqtatqan bolatyn.