Reseıde jýrnalıstiń qýdalanýyna qarsy sherý ótti
NUR-SULTAN. QazAqparat - Máskeýdiń Saharov dańǵylynda «Medýza» jýrnalısi Ivan Golýnovtyń qýdalanýyna baılanysty «Qoǵam ádilet talap etedi» atty mıtıng ótti. Bul týraly «Interfaks» HAT habarlady.
Halyqaralyq aqparat tobynyń habarlaýynsha, ereýildi Reseıdiń Lıbertarıan partııasy men Jýrnalısterdiń táýelsiz kásipodaǵy uıymdastyrǵan. Ruqsat etilgen sherýge shyqqandar «Novoe Velıchıe», «Set» (MMÝ aspıranty), Azat Mıftahanov («Ashyq Reseı» múshesi), Anastasııa Shevchenko, taǵy basqa da saıası tutqyndarǵa qatysty istiń toqtatylýyn talap etti.
Narazylyq bildirýshiler munymen shektelmeı, Sankt-Peterbýrg, Habarovsk, Nıjnıı Novgorod, Kalınıngrad, Krasnodar, Novosibir, Ýlıanovsk, Omby, Qazan, Novokýznetsk, Dondaǵy Rostov jáne Samara qalalarynda da narazylyq aktsııalaryn uıymdastyrý týraly aıtty.
Máskeý polıtsııasy aktsııa ótetin oryndarda qaýipsizdik sharalaryn kúsheıtken.
Eske salsaq, Reseıdiń Latvııadaǵy «Medýza» ınternet basylymynyń tilshisi Ivan Golýnovty 6 maýsym kúni Máskeýdegi Gúldi býlvarda júrgen jerinen polıtseıler ustap áketken. Máskeý ІІM basshylyǵy baspasóz qyzmetiniń málimdeýinshe, Golýnovtyń páterinen esirtki tabylǵan.
Máskeýdiń Nıkýlın soty 8 maýsym kúni úıqamaq bultartpaý sharasyn qoldanýǵa qaýly shyǵardy. Alaıda 11 maýsym kúni qalyń buqara ony qorǵap kampanııa uıymdastyrǵandyqtan, Golýnovqa qatysty qylmystyq tekseris toqtatylǵan. Qazirgi kezde quqyq qorǵaý organdary jýrnalısti ustaǵan polıtsııa qyzmetkerleriniń áreketterin tekserip jatyr.
