Reseıde «jumyssyz kúnder» rejımi 11 mamyrǵa deıin uzartyldy
MÁSKEÝ. TASS – QazAqparat – Reseı Prezıdenti koronavırýstyń taralýyna qarsy is-qımyl máseleleri jónindegi keńeste 6,7 jáne 8 mamyr kúnderin jumyssyz kúnder dep jarııalady, dep habarlaıdy QazAqparat TASS agenttigine silteme jasap.
Osylaısha jumyssyz kúnder rejımi 11 mamyrǵa deıin uzartyldy. Prezıdent osy ýaqyt ishinde profılaktıkalyq sharalardy qatań saqtaý kerektigin aıtty.
Pýtın mınıstrler kabınetine 12 mamyrdan bastap shekteýler rejıminen shyǵý nusqalaryn daıyndaýdy tapsyrdy. Ol muny «qazirgi epıdemıologııalyq jaǵdaıǵa jáne onyń turaqty boljamyna baılanysty» jasaý kerektigin basa aıtty. Prezıdent shekteýler bir sátte eldiń barlyq óńirinen alynyp tastalmaıtynyn da eskertti.
Sondaı-aq, Pýtın úkimetke jaqyn arada bıznes pen azamattardy qoldaý boıynsha jańa sharalar keshenin ázirleýdi tapsyrdy. Prezıdent mınıstrler men gýbernatorlar osyndaı sharalardyń oryndalýy úshin jekeleı jaýap beretinin atap ótti.
Pýtın úkimetten óńirlermen birlesip «jumyspen qamtýdy, azamattardyń kiristeri men ekonomıkalyq ósýdi qalpyna keltirý boıynsha keń aýqymdy jalpyulttyq is-qımyl josparyn» daıyndaýdy surady.
Sondaı-aq, ol Densaýlyq saqtaý mınıstrligine jaǵdaıdy árdaıym qadaǵalap otyrýdy jáne Reseı Federatsııasynyń ár adamnyń jaǵdaıy kún saıyn ózgeretinin eskere otyryp, josparlaryn únemi jańartyp otyrýdy tapsyrdy.
28 sáýirdi memleket basshysy Jedel járdem qyzmetkeri kúni dep belgileýdi usyndy.
«Aýrýdy anyqtaýdaǵy jańa jaǵdaılardyń kúndelikti sany salystyrmaly túrde turaqtandy. Biraq bosańsymaý kerek, jaǵdaı óte qıyn. Sarapshylar men ǵalymdar aýrýdyń sharyqtaý shegi áli ótpegenin aıtty», - dedi V.Pýtın óz sózinde.
