Reseıde jumys istep kelgen BQO-nyń 5 turǵynynan koronavırýs anyqtaldy
ORAL. QazAqparat – Batys Qazaqstan oblysynda taǵy alty turǵynnyń koronavırýs juqtyrǵany belgili boldy, dep habarlaıdy QazAqparat tilshisi.
Buǵan deıin habarlaǵanymyzdaı, 18 sáýir saǵat 09.30-daǵy sońǵy málimetke sáıkes, Qazaqstanda koronavırýske shaldyqqandar sany 1591-ge jetti. Onyń ishinde Batys Qazaqstanda jańadan 6 jaǵdaı tirkeldi.
BQO-nyń shuǵyl shtabynan túsken aqparatqa qaraǵanda, naýqastardyń barlyǵy – oblys turǵyndary.
Biri – Oral qalasynyń 33 jastaǵy turǵyny. Koronavırýs juqtyrǵan adammen qarym-qatynasta bolǵandyqtan buǵan deıin karantındik statsıonarǵa jatqyzylyp, zerthanalyq synama alynǵan.
Qalǵan bes adam – Reseıde vahtalyq ádispen jumys isteıtin oblys turǵyndary.
Reseıdiń Saratov oblysymen shektesetin «Tasqala» avtoótkelindegi sanıtarlyq-karantındik beketten ótken kezde olardyń ekeýinen dene qyzýynyń kóterilýi baıqalǵandyqtan, jedel járdem shaqyrylyp, provızorlyq statsıonarǵa jatqyzylǵan. Qalǵan úsheýi karantındik statsıonarǵa jetkizilgen bolatyn.
«Aýrý anyqtalǵan soń altaýy da oblystyq juqpaly aýrýlar aýrýhanasyna ornalastyryldy. Qazir jaǵdaılary qanaǵattanarlyq. Naýqastarmen qarym-qatynasta bolǵandar medıtsınalyq baqylaýǵa alynyp, aýrý oshaqtarynda dezınfektsııalyq jumystar júrgizildi», - delingen aqparatta.
Osylaısha BQO-da ınfektsııaǵa shaldyqqandar sany 39-ǵa jetip, olardyń ekeýi jazylyp shyqty.
