Reseıde jumysyn toqtatqan qandaı kásiporyndar Almatyǵa kóship keldi

ALMATY. KAZINFORM — Buryn Reseıde jumys istegen birqatar iri kompanııalardyń búgingi bas keńseleri Almatyǵa aýysty.

Almaty qalasy Kásipkerlik jáne ınvestıtsııalar basqarma basshysynyń orynbasary Qaırat Nurqasymov agenttik saýalyna jaýap bere otyryp, ákimdik Reseı Federatsııasynda qyzmetin toqtatqan iri ónerkásiptik kásiporyndar men halyqaralyq korporatsııalardy megapolıske ákelý boıynsha belsendi jumys istep jatqanyn aıtty.

Onyń sózinshe, qalada InDriver, Koppert (bıo tyńaıtqyshtar men ósimdikterdi qorǵaý óndirisi), Stada Arzneimittel (farmatsevtıkalyq óndiris), Great Wall Motors (avtomobıl óndirisi), Clariant, China Railway Construction Corporation — CRCC (temirjol qurylys korporatsııasy) jáne WEG (elektr jabdyqtaryn óndirý) sııaqty kompanııalardyń aımaqtyq keńseleri ashyldy.

Sonymen qatar buryn óz qyzmetin Reseıde júzege asyrǵan Honeywell kompanııasy 2022 jyly Almatyda basqarý qoraptaryn qurastyrý boıynsha jańa óndiris ornyn iske qosty. Al ındýstrııalyq aımaqta Weir Minerals zaýyty sorǵy jabdyqtaryn, gıdrotsıklondardy jáne bekitý armatýrasyn óndirý jáne qalpyna keltirý boıynsha jumysyn bastady. Oǵan 1,25 mlrd teńge ınvestıtsııa salynyp, 60-tan astam jumys orny quryldy.

Eske salaıyq, buǵan deıin Qazaqstanda joǵary tehnologııalyq drondar óndirisi josparlanyp otyrǵanyn jazǵanbyz.