Reseıde jolaýshylardy qutqarǵan Erjannyń baspana máselesi sheshilmek
SEMEI. QazAqparat - «Semeı-Novosibir» baǵytynda órtengen avtobýstan jolaýshylardy qutqarýǵa atsalysqan Erjan Amarhanovqa búgin «Turǵyn-úı qurylys jınaq banki» AQ Semeı qalasyndaǵy fılıaly baspana alý úshin tegin esepshot ashyp berdi, dep habarlaıdy QazAqparat.
Búgin Erjan atalmysh bankpen kelisimge otyrdy. Aqshanyń tabystylyǵyn arttyrý maqsatynda depozıt áıeli men óziniń atyna jekeleı ashylady. ıAǵnı, memlekettik syıaqy osy depozıtterdiń árqaısysyna beriletin bolady. Al baspanalar alar kezde «Otbasylyq paket» aıasynda eki depozıt bir salymǵa biriktiriledi. Erjan osy arqyly bolashaqta tómen paıyzdyq mólshermen jańa páterge ıe bola alady.
«Biz basyn qaterge tige otyra erlik tanytqan jerlesimizge óz yqylasymyzdy bildirýden shet qala almadyq. Erjandy TÚQJB-ne shaqyryp, turǵyn úı jınaqtary jóninde kelisimge otyrdyq. Al, usynylǵan alǵashqy jarnany eki shotqa da ózimiz salamyz», - dedi «Turǵyn-úı qurylys jınaq banki» AQ Semeı qalasyndaǵy fılıalynyń dırektory Ravıl Sabıtov.
Eske sala keteıik, 37 jastaǵy qala turǵyny Erjan Amarhanov tamyzdyń 4-i kúni keshki saǵat 19.50-de «Semeı - Novosibir» baǵytynda órtengen jolaýshylar avtobýsynan 48 adamdy qutqarǵan bolatyn.
Buǵan deıin qala ákimi Ermak Sálimovtiń qabyldaýynda bolǵan Erjanǵa qarjysynyń janyp ketýine baılanysty, jergilikti kásipker «Gordorstroı» JShS dırektory Baýyrjan Qaırambaev 1 mıllıon teńge tapsyrdy.
