Reseıde jol apatynan 3 adam qaza taýyp, 40-tan astamy zardap shekti
MÁSKEÝ. TASS – QazAqparat – Novorossııskiniń mańynda avtobýs pen jeńil kólik soqtyǵysyp, saldarynan eki kólik te quzdan qulap ketti. 40-tan astam adam zardap shegip, 3 adam qaza tapty. Kóz jumǵandardyń arasynda bir bala bar, dep habarlaıdy QazAqparat TASS agenttigine silteme jasap.
Krasnodar ólkesiniń Densaýlyq saqtaý mınıstrliginiń aqparatynsha, 44 adam aýrýhanaǵa jetkizildi, olardyń 12-si – balalar.
Reseı ІІM Bas basqarmasynyń Krasnodar ólkesi boıynsha baspasóz qyzmetinen málim etkendeı, jol apatynan kóz jumǵandardyń barlyǵy – jeńil kóliktiń jolaýshylary.
«Qaza tapqan áıel men kámelet jasqa tolmaǵan eki bala – jeńil avtokóliktiń jolaýshylary. Volkswagen Touareg avtokóliginiń 1974 jyly týǵan júrgizýshisi ortasha aýyr halde aýrýhanaǵa jetkizildi», - dedi vedomstvodan.
Novorossıısk meriniń orynbasary Natalıa Maıorova TASS agenttigine málim etkendeı, jol-kólik oqıǵasy saldarynan 31 adam aýrýhanaǵa jetkizildi, beseýi aýyr halde jatyr. «31 adam bizdiń aýrýhanada jatyr, arasynda balalar bar. Bes adamnyń hali aýyr», - dedi ol.
Avtobýs pen jeńil kóliktiń soqtyǵysýy 7 tamyz kúni keshke, Verhnebakanskıı aýylynyń mańyndaǵy A-146 tasjolynda bolǵan. Soqtyǵysqan kólikterdiń ishinde 45 adam boldy. Avtobýs «Ellada» shıpajaıyna tıesili.
