Reseıde joǵalyp ketken 4 avtokólik SQO-dan tabyldy
SQO polıtsııa departamenti baspasóz qyzmetiniń málimetinshe, kólikti aıdap áketý jáne avtokólikpen baılanysty ózge de quqyqqa qaıshy áreketterdi ashý jáne aldyn alý maqsatynda oblysta 16 tamyzdan bastap «Avtomobıl» respýblıkalyq jedel-profılaktıkalyq is-sharasy bastaldy. Operatsııa 22 tamyzǵa deıin shaqtalǵan. Osy aralyqta polıtseıler garajdar, avtoturaqtar, avto bólshektep satý oryndaryn, bazarlar men sheberhanalardy aralap, krımınalǵa qatysy bar avtokólikter men qosalqy bólshekter bolýy múmkin jerlerdi tekseredi. Jaýap alý, esepke qoıý jáne barlyq málimetterdi taldaý qylmystardy ashý kezinde qajetti aqparatty jańartýǵa múmkindik beredi.
Qazir oblys boıynsha 14 jedel-izdestirý toby jumys isteıdi, operatsııanyń úsh kúni ishinde olar 123 pýnktte: tehnıkalyq qyzmet kórsetý stantsııalarynda, avtosheberhanalarda, bólshektep satý pýnktteri men avtoturaqtarda boldy. 581 avtokólik tekserildi. Nátıjesinde Reseı aýmaǵynda joǵalǵan 4 sheteldik kólik anyqtaldy. Mán-jaı qazir anyqtalyp jatyr, reseılikterge aqparat jiberildi. Avtomashınalar tárkilenip, Petropavldaǵy arnaıy turaqqa qoıyldy.
Sonymen qatar, «Avtomobıl» is-sharasy aıasynda qalalyq jáne aýdandyq polıtseıler buryn jasalǵan úsh qylmysty, sonyń ishinde «ótken jyldar» sanatyndaǵy qylmysty ashty. «Opel» markaly eki avtokólik pen «Audi 80» markaly kólikti urlaýdaǵy kúdiktiler ustaldy. Sotqa deıingi tergeý júrgizilip jatyr.
«Agregattardaǵy sáıkestendirý nómirlerin joıý jáne túzetýge mamandandyrylǵan sheberhanalardy anyqtaýǵa erekshe kóńil bólinedi. Sondaı-aq metall qabyldaý pýnktteri, kólik az tynysh aýdandardaǵy kólik qoıatyn oryndar men aýla ishi aýmaqtar tekseriledi. Avtokólik urlaǵany úshin buryn qylmystyq jaýaptylyqqa tartylǵan azamattarmen profılaktıkalyq áńgime júrgiziledi», - deıdi SQO PD krımınaldyq polıtsııa basqarmasynyń bastyǵy Petr Klımov.
