Reseıde Jeńistiń 70 jyldyǵyna baılanysty 225 myńnan astam sottalýshy jazadan bosatyldy
ASTANA. QazAqparat - Reseıde Jeńistiń 70-jyldyǵy qurmetine sáýirdiń 24-i men qazannyń 24-i aralaǵynda 225 myńnan astam jazasyn óteýshi jáne tergeýdegi reseılikterge raqymshylyq jasaldy dep habarlady «Interfaks».
40 myńnan astamy túrmeden bosatyldy. Qalǵandary túrmeden bólek jazadan azat etildi. Raqymshylyqqa, atap aıtqanda, ortasha aýyrlyqta qasaqana qylmys jasaǵany úshin birinshi ret sottalǵandar, sottalýshylardyń arasynda elge eńbegi sińgen, eńbegimen erekshelengender bar. Budan basqa, kámelettik jasqa tolmaǵandar, kámeletke tolmaǵan balalary nemese múgedek balalary bar áıelder, jalǵyz basty analar, júkti áıelder, I jáne II toptaǵy múgedekter, 55-ten asqan er adamdar, 50-den asqan áıelder jáne úshinshi, tórtinshi satydaǵy isik aýrýymen aýyratyn naýqastar da bar. Memlekettik dýma depýtattary raqymshylyq jarııalaý týraly qaýly jobasyn sáýirde qabyldaǵan. Raqymshylyq merzimi jarty jylǵa belgilendi. ıAǵnı, 24 qazanda búgin aıaqtalady.
