Reseıde Jeńis parady 24 maýsymda ótedi
NUR-SULTAN. QazAqparat – RF Prezıdenti Vladımır Pýtın Qorǵanys mınıstri Sergeı Shoıgýmen bolǵan jınalysta Jeńis paradynyń 24 maýsymda ótetinin jarııalady, dep habarlaıdy QazAqparat Reseıdiń TASS aggenttigine silteme jasap.
«Ekinshi dúnıejúzilik soǵystaǵy Jeńistiń 75 jyldyǵyna oraı Reseı astanasy Máskeý men basqa da qalalarda áskerı paradqa daıyndyqty bastaýdy buıyramyn. Biz ony 24 maýsymda, 1945 jyly Máskeý túbinde soǵysqan jáne Lenıngradty qorǵaǵan, Eýropany azat etken, Berlındi shabýyldap basyp alǵan maıdangerlerdiń Qyzyl alańda júrip ótken kúni, dańqty, tarıhı jeńimpazdar parady bolǵan kúni ótkizemiz», - dep buıryq berdi RF Prezıdenti.
Pýtın Shoıgýǵa paradqa qatysýshylardyń densaýlyǵyna tónetin kez kelgen qaýiptiń aldyn alýdy tapsyrdy.
«Sizge paradty ótkizý jáne oǵan daıyndyq kezinde qatań qaýipsizdik sharalaryn qamtamasyz etýdi buıyramyn. Onyń barlyq qatysýshylaryna tónetin qaýip múmkindiginshe tómen bolýy kerek», - dedi Pýtın.
Prezıdent mundaı sheshimdi eldiń kóptegen óńirlerindegi jáne Qarýly Kúshterdegi jaǵdaıdyń juqpaly aýrýdyń taraýy sharyqtaý sheginen ótkeninen soń turaqtaǵanyn eskere otyryp qabyldaǵanyn túsindirdi.
Sondaı-aq, ol «osy qıyn ýaqytta áskerde oqý-jattyǵý ótip, Reseı qorǵanysyn qamtamasyz etýdegi mańyzdy tapsyrmalar sheshilgenin, osy jyly ásker qataryna shaqyrylǵan azamattardyń qabyldanǵan profılaktıkalyq sharalardyń arqasynda ınfektsııa taralý qaýpinen barynsha qorǵalǵanyn atap ótti.
RF Memleket basshysy paradta kórermenderdiń bolatynyn naqtylamady.
Eske salaıyq, búgin RF prezıdenti Vladımır Pýtın Qasym-Jomart Toqaevty 24 maýsym kúni Máskeýde ótetin Jeńis paradyna qurmetti qonaq retinde qatysýǵa shaqyrdy. Qazaqstan Prezıdenti shaqyrtýdy rızashylyqpen qabyl aldy.
