Reseıde jeńil kólikterdiń satylymy kúrt tómendedi
ASTANA. QazAqparat - Reseıde jeńil avtomobılder men jeńil kommertsııalyq kóliktiń satylymy 2014 jyldyń 8 aıynda 12,1 paıyzǵa tómendedi, dep habarlaıdy Eýropalyq bıznes qaýymdastyǵy.
VVS-diń jazýynsha, aǵymdaǵy jylǵy segiz aıda Reseıde 1,582 mln. jańa mashına satyldy. Bul 2013 jyldyń osy kezeńinde satylǵan kólik sanymen salystyrǵanda 217 092 danaǵa az.
Tamyzdaǵy kólik satylymy 25,8 paıyzǵa qulaǵan nemese ótken jyldyń tamyzyna qaraǵanda 59 900 mashınaǵa kem saýdalanǵan eken.
Bıylǵy shildede RF Premer-mınıstri Dmıtrıı Medvedev memlekettik organdarǵa shetelde óndirilgen kólikterdi alýǵa tyıym salǵan bolatyn.
Qazirgi kezde reseılik avtonaryqta «AvtoVAZ» kósh bastap tur, alaıda tamyzda Lada avtomobılderiniń satylymy jyldyq esepteýde birden 32 paıyzǵa quldyrady.
Munymen qosa Chevrolet (-50%), Ford (-57%), Daewoo (-55%), Suzuki (-58%), Peugeot (-56%), Citroen (-52%) kólikteriniń satylymy eki esege kemidi.
