Reseıde jazda qazaqstandyqtardy tirkeý erejesi ózgeredi
ASTANA. QazAqparat - Reseıde fýtboldan Álem chempıonaty ótýine baılanysty 2018 jyldyń 25 mamyrynan 25 shildesine deıin qazaqstandyqtardy tirkeý erejesi ózgeredi. Bul týraly Qazaqstannyń Reseıdegi Elshiliginiń saıty habarlaıdy.
Atap aıtqanda, Máskeý, Sankt-Peterbýrg, Qazan, Sochı, Volgograd, Ekaterınbýrg, Kalınıngrad, Nıjnıı Novgorod, Dondaǵy Rostov, Samara jáne Saransk qalalarynda shetel azamattaryn tirkeýdiń erekshe erejeleri qoldanylady.
25 mamyrdan bastap joǵaryda atalǵan qalalarǵa baratyn Qazaqstan azamattary bir táýlik ishinde kóshi-qon jónindegi jergilikti organda tirkeledi, kóshi-qon organdary 25 mamyrdan 25 shildege deıin kúsheıtilgen rejimde jumys isteıdi.
Osy erejeler Máskeý, Sankt-Peterbýrg, Qazan, Sochı, Volgograd, Ekaterınbýrg, Kalınıngrad, Nıjnıı Novgorod, Dondaǵy Rostov, Samara jáne Saransk qalalaryna barǵan shetel azamattaryna ǵana júredi, al eldiń basqa óńirlerinde burynǵy tártip saqtalady. ıAǵnı RF-ǵa 30 kúnnen az ýaqytqa barǵan Qazaqstan azamattary tirkelýge mindetti emes.
Qonaqúılerde, sanatorıılerde, demalys úıleri nemese basqa da ýaqytsha ornalasý oryndarynda ýaqytsha turatyn Qazaqstan azamattarynyń tirkelýine qabyldaýshy tarap (qonaqúı, sanatorıı, t.b. ákimshiligi) jaýapty.
Konsýldyq okrýgterge sáıkes, RF qalalarynyń aýmaǵyndaǵy QR azamattary myna mekemelerge habarlasýyna bolady:
- Máskeý, Sochı jáne Dondaǵy Rostov - Máskeýdegi QR Elshiliginiń konsýldyq bólimine;
- Sankt-Peterbýrg jáne Kalınıngrad - Sankt-Peterbýrgtegi QR Bas konsýldyǵyna;
- Qazan, Ekaterınbýrg, Nıjnıı Novgorod jáne Saransk - Qazandaǵy QR Bas konsýldyǵyna;
- Volgograd jáne Samara - Astrahandaǵy QR Konsýldyǵyna.
