Reseıde jasóspirimderge arnalǵan koronavırýs vaktsınasy tirkeldi

NUR-SULTAN. QazAqparat – Reseıde jasóspirimderge salynatyn koronavırýsqa qarsy vaktsına tirkeldi. Bul týraly Qazaqstanda COVID-19 taralýyna jol bermeý jónindegi vedomstvoaralyq komıssııanyń Telegram-kanalynda aıtyldy, dep habarlaıdy QazAqparat.

Reseı Federatsııasy 12-17 jastaǵy jasóspirimderge arnalǵan koronavırýs ınfektsııasyna qarsy vaktsınany resmı túrde tirkedi. N.Gamaleıa atyndaǵy Epıdemıologııa jáne mıkrobıologııa ulttyq zertteý ortalyǵy (EMUZO) jasóspirimderge COVID-19-ǵa qarsy vaktsınasyn qoldaný quqyǵyn aldy. Bul týraly atalmysh ortalyq basshysynyń orynbasary Denıs Logýnov málim etti. Qazan aıynyń ortasynda EMUZO dırektory Aleksandr Gıntsbýrg koronavırýsqa qarsy vaktsına «Spýtnık M» dep atalatynyn habarlaǵan bolatyn. Jasóspirimderge ekpe erikti negizde jáne ata-anasynyń nemese zańdy ókilderiniń jazbasha kelisimimen ǵana jasalatyn bolady.

Ulybrıtanııa ǵalymdary koronavırýstyń aýyr shtamynyń qaýpi bar ekenin málimdedi. Olar B.1.1.529 shtamynyń 32 yqtımal qaýipti mýtatsııasyn anyqtady. Bul ózgerister belgili SARS-CoV-2 nusqalaryna qaraǵanda vaktsınalarǵa tózimdiligin arttyra túsedi. Sonymen qatar mýtatsııa patogendi antıdenelermen anyqtaýdy qıyndatady. Ázirge bul shtammen ınfektsııanyń 10 jaǵdaıy anyqtaldy. Úsheýi Bostvanda, altaýy Ońtústik Afrıkada, taǵy bireýi Gonkongta tirkelgen. Sarapshylar tolyq zertteýge deıin jańa shtamnyń qanshalyqty juqpaly bolatyndyǵy týraly aqparat usynǵan joq.