Reseıde jasalǵan qylmysqa qatysy bar 11 avtomashına BQO-dan tabyldy
BQO polıtsııa departamentiniń baspasóz qyzmeti málim etkendeı, reseılik polıtseıler bergen derekter boıynsha Reseıden Qazaqstanǵa áketilgen 606 avtokóliktiń qylmystyq oqıǵalarǵa qatysy bar bolyp shyqty.
Sonyń 48-i Batys Qazaqstan oblysynda júr. Osyǵan baılanysty polıtsııa qyzmetkerleri mundaı kólikterdi anyqtaý ústinde.
«Kúni búginge deıin tabylǵan 11 avtokóliktiń qaıda júrgeni jáne ıeleri týraly reseılik izdestirýshiler tarapyna málimet berildi. Atalǵan kólikter aıyp turaǵyna qoıyldy. Reseılik avtokólikti alar kezde satyp alýshylar QR ІІM bazasy boıynsha tekserý úshin aldymen BQO polıtsııa departamentine habarlasýy kerek» dep habarlady vedomstvodan.
Departament málimetine qaraǵanda, bıylǵy on aı ishinde óńirde 243 jol-kólik oqıǵasy saldarynan 84 adam qaza taýyp, 357-si túrli jaraqat aldy.
Sonyń ishinde sheteldik avtokólikterdiń qatysýymen 89 jol apaty bolyp, 32 adam kóz jumyp, 122-si jaraqat aldy.
Eske sala keteıik, budan buryn Oral qalasynda úıdiń aýlasynan mına tabylǵanyn jazǵan bolatynbyz.
