Reseıde jaryq kóretin «Omby qazaqtary» gazeti qandastarymyzdyń arasynda zor suranysqa ıe (FOTO)
ASTANA. QazAqparat - Osydan bes jyl buryn «Omby qazaqtary» qaýymdastyǵy Reseıde «Atameken» (Malaıa Rodına) gazetin shyǵarǵan bolatyn. Bul jańalyqty respýblıkalyq BAQ súıinshilep jetkizgen edi. Gazet búkil Reseıde resmı tirkelgen tuńǵysh qazaq basylymy boldy.
Árıne, Máskeýde, Astrahanda, Samara men Saratovta osy syndy gazetterdiń jaryq kóretini málim. Degenmen, bul gazetter resmı tirkeýden ótpegen edi. Alaıda, ókinishke oraı, bul qýanyshymyz uzaqqa sozylmady. Atalǵan gazet qarjy máselesine baılanysty jabylyp qaldy.
Áıtse de Ombydaǵy qazaq jastary bul máseleni sheshýge tyrysty. Qazaq halqynyń ádebıetimen sýsyndatyp, ádet-ǵurpy men dástúrin ulyqtaýdy maqsat etken «Omby qazaqtary» qaýymdastyǵy 2014 jyldyń naýryz aıynda Omby oblysynyń aımaqtyq qazaq ulttyq-mádenı avtonomııasynyń qoldaýymen «Omby qazaqtary» basylymyn jaryqqa shyǵardy.
«Basylymǵa at qoıý kezinde biz kóp oılandyq, - dep oıymen bólisti gazettiń bas redaktory Torǵyn Áshenova. - Usynystar ár túrli boldy, Dostyq, Atameken, t.b. ataýlar usynyldy. Biz aqyldasa kele «Omby qazaqtary» degen ataýǵa toqtadyq.
Qazir bizdiń basylymnyń 11 myńnan astam oqyrmany bar. Gazetimizdiń alǵashqy sanyn arnaıy yrymdap, qazaqtyń «Naýryz» merekesinde tanystyrdyq», - deıdi ol.
Torǵyn Áshenovanyń aıtýynsha, gazet «Redaktsııaǵa hat», «Abaıdyń qara sózderi», «Aýylym meniń», «Qazaq esimderi» syndy aıdarlarmen qazaq jáne orys tilderinde shyǵady.
«Alǵashynda gazet 999 dana bolyp basylǵan edi. Sebebi, tıraj myńnan assa resmı tirkelý kerek bolady. Gazettiń ár sany jaryq kórgen saıyn biz onyń ólkemizdegi 100 myńnan asa qazaq úshin óte az ekenin túsindik. 2014 jyldyń qazan aıynda resmı tirkeýden ótip, tırajymyzdy 2 myńǵa deıin kóbeıttik, al qazir 3 myń danamen aı saıyn jaryq kórýde. Biz bul basylymda Ombydaǵy qazaqtardyń ulttyq sana-sezimin oıatyp, mádenıeti men ádebıetimen tanystyratyn maqalalar jarııalaımyz. Qazaqstanda bolyp jatqan jańalyqtarmen bólisip otyramyz. Keıbir turaqty oqyrmandarymyz, ata-ájelerimiz de osy basylym arqyly óz oı-pikirlerin ortaǵa salyp jatady. Gazetimizdiń qazaqtar arasynda ǵana emes, basqa ult ókilderi arasynda suranysqa ıe bolyp otyrǵandyǵy bizdi qýantady», - deıdi basylymnyń bas redaktory.
«Gazet - halyqtyń kózi, qulaǵy hám tili»,- dep Ahmet Baıtursynov aıtqandaı, shet jerdegi qandastarymyzdyń ana tilin, dilin umyttyrmaıtyn, ulttyq rýhpen sýsyndatyp otyratyn osyndaı basylymdarymyz kóp bola bersin dep tileıik.
Gúlden Ospanova
