Reseıde jappaı tóbelesken 11 ózbekstandyq qamaýǵa alyndy

ASTANA. KAZINFORM — Reseıdiń Amýr oblysy Svobodnyı qalasyndaǵy mektep stadıonynda jappaı tóbeles uıymdastyrǵan Ózbekstannyń 11 azamaty sot sheshimimen qamaýǵa alyndy, dep habarlaıdy oblystyq sottyń baspasóz qyzmeti. 

Olarǵa buzaqylyq jasady degen aıyp taǵyldy (Reseı Ákimshilik jaýapkershilik kodeksiniń 20.1-babynyń 1-bóligi). Sot barlyǵyn kináli dep taýyp, 12-14 táýlikke ákimshilik qamaýǵa alý týraly úkim shyǵardy.

Mıgranttardy 25 mamyrda Svobodnyıdaǵy mektep stadıonynda fýtbol matchy kezinde týyndaǵan tóbeles úshin polıtsııa qyzmetkerleri ustady. Bir adamǵa medıtsınalyq kómek qajet boldy.

Bul rette polıtsııa denege ortasha aýyrlyqtaǵy zııan keltirý faktisi boıynsha (RF Qylmystyq kodeksiniń 112-baby, 1-bóligi) qylmystyq is qozǵady.

- Kináli dep tanylǵandar 3 jylǵa deıin bas bostandyǵynan aıyrylýy múmkin. Sondaı-aq olarǵa Reseıge kirýge tyıym salynady, - dep habarlady Amýr oblysy boıynsha tergeý komıteti.

Tergeýdi Reseı Tergeý komıtetiniń basshysy Aleksandr Bastrykın óz baqylaýyna alǵany atap ótilgen.

Eske sala keteıik, Reseıde zorlyq-zombylyqtyń qurbany bolǵan áıel úsh balasymen Ózbekstanǵa qaıtaryldy.