Reseıde zeınet jasy ózgermeıdi – Dýma tóraǵasy

ASTANA. KAZINFORM – Reseı Memlekettik Dýmasynyń tóraǵasy Vıacheslav Volodın plenarlyq otyrys barysynda elde zeınet jasyn ulǵaıtý josparlanbaıtynyn aıtty, dep habarlaıdy agenttiktiń menshikti tilshisi.

Volodınniń aıtýynsha, Memdýma Eńbek, áleýmettik saıasat jáne ardagerler isteri komıtetiniń múshesi Svetlana Bessarabtyń sózi burmalanyp jetkizilgen. Buǵan deıin Bessarab zeınetke 10 jyl kesh shyǵý jaǵdaıynda tólem mólsheriniń aıtarlyqtaı ósetinin aıtqan edi.

— Bul — kóbirek jumys isteýdiń artyqshylyqtary týraly áńgime, — dedi Volodın.

16 qarashada Svetlana Bessarab TASS agenttigine bergen suhbatynda zeınetke shyǵýdy bes jylǵa shegerý jeke zeınet koeffıtsıentiniń 36%, al bazalyq bóliktiń 45% ulǵaıýyna alyp keletinin túsindirgen.

Eger azamat zeınetke 10 jyl kesh shyqsa, jeke koeffıtsıentter 2,32 ese, al bazalyq bólik 2,11 ese ósedi.

Sonymen qatar, 25 qazanda Memdýma depýtaty Alekseı Govyrın 1997 jylǵa deıin eńbek jolyn bastaǵan egde azamattar zeınetaqyǵa qosymsha ústemaqy ala alatynyn málimdegen. Ol úshin azamattar turǵylyqty jeri boıynsha Áleýmettik qor bólimshesine ótinish berip, eńbek ótilin rastaıtyn qujattardy usynýy tıis.

Eske salaıyq, buǵan deıin Frantsııada zeınet jasyn 64 jasqa deıin kótermeý týraly sheshim qabyldanǵany habarlanǵan edi.