Reseıde zańsyz júrgen sheteldikterge mártebesin zańdastyrý úshin bir aı qaldy

ASTANA. KAZINFORM — Reseı Federatsııasynda mıgratsııalyq erejelerdi buzyp júrgen sheteldikterge óz mártebesin zańdastyrýǵa nemese elden shyǵýǵa bir aı ýaqyt qaldy. Bul týraly TASS habarlaıdy.

Reseı Іshki ister mınıstrliginiń málimetinshe, olar 2025 jylǵy 10 qyrkúıekke deıin kóshi-qon qyzmetine júginý arqyly óz jaǵdaılaryn retteı alady.

Bul talap Reseıde bolý negizderin joǵaltqan jáne «baqylaýdaǵy tulǵalar» tizimine engizilgen sheteldikterge qatysty. Maýsym aıynyń ortasynda bul tizimde 800 myńnan astam adam tirkelgen bolatyn. Mınıstrlik ókilderi 10 qyrkúıekten keıin quqyqtyq mártebeni retteý múmkin bolmaıtynyn eskertti.

Zańdy mártebe alý úshin sheteldikter FGÝP «PVS» Reseı Federatsııasy ІІM-niń kez kelgen fılıalyna turǵylyqty jeri boıynsha júginýi tıis.

Sondaı-aq ІІM zańsyz eńbekke tartylǵan sheteldikter boıynsha jáne eńbek sharty jasalǵany nemese toqtatylǵany týraly kóshi-qon organdaryna habar bermegeni úshin de ákimshilik jaýapkershilik qarastyrylǵanyn eske saldy. Mundaı zańbuzýshylyqtar úshin laýazymdy tulǵalarǵa — 50 myń rýblge, al zańdy tulǵalarǵa — 800 myń rýblge deıin aıyppul salynady.

Baqylaýdaǵy tulǵalar tizimine engen sheteldikterge qyzmet kórsetý (bilim berý salasynda da) ákimshilik quqyqbuzýshylyq bolyp sanalady. Bul úshin jeke tulǵalarǵa — 2 000–5 000 rýbl, laýazymdy tulǵalarǵa — 35 000–50 000 rýbl, al uıymdarǵa — 400 000–500 000 rýbl kóleminde aıyppul qarastyrylǵan.

Eske salaıyq, buǵan deıin Qazaqstanda kóshi-qon rejımin buzǵan 200 myń shetel azamaty jaýapqa tartylǵanyn jazǵanbyz.