Reseıde XIX Búkilálemdik jastar men stýdentter festıvali ótip jatyr
ASTANA. QazAqparat - Búgin Sochı qalasynda ashylǵan XIX Búkilálemdik jastar men stýdentter festıvaliniń (BJSF) basty taqyryby álemniń bolashaǵyn qurý bolmaq. Festıvalge álemniń 180 elinen 20 myńnan astam jastar qatysady, dep habarlaıdy QazAqparat reseılik TASS agenttigine silteme jasap.
XIX Búkilálemdik jastar men stýdentter festıvaliniń prezıdenti (BJSF) Nıkolas Papadımıtrıý festıval jastarǵa senim men jiger beredi degen senimin bildirdi. Sharany uıymdastyrýshylar basynda festıvalge 20 myń adam qatysady, onyń teń jartysy reseılikter al qalǵany álemniń 180 elinen kelgen sheteldik qonaqtar bolady dep málim etti, alaıda senbi kúni festıvaldiń baspasóz qyzmeti forýmǵa adamnyń josparlanǵan mólsherden kóp kelgenin atap ótti. Festıvaldiń qonaqtary men spıkerleriniń tizimi de az emes. Álemniń jastarymen reseılik saıasatkerler men mınıstrler, tanymal qoǵam jáne mádenıet qaıratkerleri, dinı uıymdardyń ókilderi kezdesedi.
Sheteldik qurmetti qonaqtar qatary da kóp. Atap aıtar bolsaq, Halyqaralyq fýtbol federatsııasynyń bas hatshysy (FIFA) Fatma Samýra, motıvatsııa berýshi sheshen Nık Výıchıch, kınorejısser Klod Lelýsh, mýzykant Mıshel Legran, Google-diń damýshy naryqtar boıynsha GR-dırektory Doron Avnı, sondaı-aq Búkilálemdik jabaıy haıýanattar qorynyń bas dırektory (WWF) Marko Lambertını kelgen.
Búkilálemdik jastar men stýdentter festıvali festıvaldik qozǵalystyń kópjyldyq dástúrine sáıkes, kún saıyn ǵalamsharymyzdyń bir aımaǵyna: Amerıka, Taıaý Shyǵys, Azııa jáne Muhıt araldary, Eýropaǵa arnalatyn bolady. 21 qazanda festıvalde Reseı kúni josparlanǵan.
Festıvaldiń talqylaý baǵdarlamasy 12 jahandyq taqyrypty qamtıdy: «Bolashaqtyń ǵylymy jáne jahandyq bilim berý», «Bolashaqty jobalaý: sáýlet jáne dızaın», «Bolashaq tehnologııalary», «Ekologııa jáne densaýlyq», «Halyqaralyq mádenı keńistik», «Bolashaq avıatsııasy», «Jahandyq saıasat jáne onyń kún tártibi: álemdi qalaı qorǵaý kerek», «Bolashaqty damytý ekonomıkasy», «Dúnıejúzilik temirjol jelisi: bolashaqqa jaqyndaı otyryp», sondaı-aq «Jańa medıa» jáne «Azamattyq damý platformasy».
Festıval uıymdastyrýshylary jıyrmaǵa jýyq sport alańdaryn usynady. Olardyń arasynda Jibek joly rallı-marafonynyń, kóshe basketbolynyń, vorkýtanyń, bı sportynyń, akrobatıkalyq rok-n-rolldyń, ulttyq sport túrleri men ekstremaldy sport túrleriniń ınteraktıvti aımaqtary bar.
Budan basqa, konkı tebý jáne hokkeı men mánerlep syrǵanaý úshin alańdar, jaýyngerlik óner kórsetý aımaǵy jasaqtalady.
Keń aýqymdy baǵdarlama 2018 jyly Reseıde ótetin Álem kýbogyna arnalady. BJSF negizgi oqıǵalary Sochıdegi Olımpıadalyq parktiń aýmaǵynda uıymdastyrylady. Basty medıa-ortalyq aýmaǵynda pikirtalastar, ǵylymı jáne bilim berý baǵdarlamalary, «YOUTH EXPO» jastardyń jetistikter kórmesi ótedi jáne kınofılmder kórsetiledi.
Eske sala ketsek, budan buryn BJSF Máskeýde 1957 jyly jáne 1985 jyly eki ret ótken bolatyn.
XIX Búkilálemdik jastar men stýdentter festıvali Máskeýde 14 qazanda bastaldy. Festıvaldiń negizgi oqıǵalary 15-22 qazanda Sochıdegi Olımpıada parkinde ótedi.
Forýmda 180 elden kelgen 18-35 jas aralyǵyndaǵy túrli salalardyń bıik shyńdaryn baǵyndyryp júrgen jas kásipqoılar bas qosady. Festıvaldi ótkizýge 5 myńnan astam erikti kómek kórsetip jatyr.
