Reseıde WhatsApp buǵattaldy

MÁSKEÝ.KAZINFORM — Reseıde Roskomnadzor (RKN) WhatsApp messendjeriniń jumysyn kezeń-kezeńimen shekteýdi jalǵastyryp otyr, onyń tolyqtaı buǵattalýy da múmkin. Buǵan sebep retinde Reseı zańnamasynyń júıeli túrde buzylýy atalady, dep habarlaıdy agenttik tilshisi.

Soǵan qaramastan, WhatsApp Reseıdegi eń tanymal messendjer bolyp qala berýde, onyń biregeı paıdalanýshylarynyń sany shamamen 100 mln adamǵa jetedi.

RKN ókilderiniń aıtýynsha, reseılik zańnama talaptary oryndalǵanǵa deıin messendjerge qatysty shekteýler engizý jalǵasa bermek.

Shekteý sharalary paıdalanýshylardyń basqa baılanys qosymshalaryna kóshýine múmkindik berý úshin kezeń-kezeńimen engizilýde. Paıdalanýshylarǵa ulttyq (reseılik) servısterge kóshý usynylady.

Mezgil-mezgil paıdalanýshylar messendjer jumysyndaǵy aqaýlarǵa shaǵymdanady. «Sboı.rf» jáne Detector404 monıtorıngtik servısteriniń derekterine sáıkes, irkilister birden birneshe óńirde baıqalǵan.

Shekteýler kezeńdik sıpatqa ıe. Qońyraýlardyń «degradatsııasy» protsesi osy jyldyń tamyz aıynda bastalǵan. Sondaı-aq BAQ 22 jeltoqsannan bastap Reseıde messendjerdiń jumys jyldamdyǵy 70–80%-ǵa tómendegenin, al baılanys operatorlarynyń buǵan qatysy joq ekenin habarlaǵan.

Buǵan deıin reseılik «Molnııa» messendjerin iske qosý 2026 jylǵa shegerilgeni habarlanǵan bolatyn, bastapqyda ony osy jyldyń qyrkúıeginde iske qosý josparlanǵan edi.