Reseıde vıza tártibi qatańdady: qazaqstandyq júrgizýshilerdiń máselesi EEK otyrysynda qaralady
MÁSKEÝ. KAZINFORM — Qazaqstandyq avtotasymaldaýshylardyń máselesi Eýrazııalyq ekonomıkalyq komıssııa alańynda talqylanady, dep habarlaıdy Kazinform menshikti tilshisi.
— 12 qarashada Eýrazııalyq ekonomıkalyq komıssııanyń kóshi-qon jónindegi jumys tobynyń otyrysynda Reseıde jappaı shekteýlerden kedergilerge tap bolǵan qazaqstandyq avtotasymaldaýshylarǵa qatysty jaǵdaı talqylanady, — dep málim etti EEK-den agenttik menshikti tilshisine.
EEK málimetinshe, buǵan deıin Eýrazııalyq ekonomıkalyq komıssııanyń Kólik jáne ınfraqurylym departamentinde sarapshylyq kezdesý ótedi dep josparlanǵan.
Esterińizge sala keteıik, Májilis depýtaty Bolatbek Nájmetdınuly buǵan deıin Reseı Federatsııasyndaǵy vızanyń jańa tártibi on myńdaǵan júrgizýshi men halyqaralyq avtokólik tasymalymen aınalysatyn kompanııaǵa qaýip tóndirgenin málimdegen bolatyn.
— Sońǵy ýaqytta halyqaralyq avtomobıl tasymalymen aınalysatyn bizdiń júrgizýshiler men kompanııalar jappaı Reseı Federatsııasynda bolý uzaqtyǵyna shekteý qoıa bastady. № 115-FZ Federaldyq zańyna (2024 jylǵy 8 tamyzdaǵy túzetýlermen) ózgertýler engizilgennen keıin vızalyq erejeler Reseıge vızasyz kelgen sheteldik azamattardyń Reseıde kúntizbelik jyl ishinde 90 kúnnen aspaıtyn merzimge bolýyn qarastyrady. Bul ereje halyqaralyq avtomobıl tasymaldarynyń erekshelikterin eskermeıdi. Júrgizýshilerimiz basqa elde jeke sebeptermen emes, qyzmettik mindetterin oryndaýda júr. Al, jańa talaptar olardy Reseı zańnamasyn buzatyn jaǵdaıǵa ákelip soqtyrady, — dep jazdy depýtat Facebook paraqshasynda.
Onyń aıtýynsha, kóptegen júrgizýshiler osyndaı jaǵdaıǵa tap bolǵan.
— Reseı men Belarýste ótkizilgen ýaqyt jıyntyq bolǵandyqtan, Belarýs arqyly tranzıttiń ózi Reseıde bolý bolyp esepteledi. Odan bólek, Odaqtyń Eýropalyq Odaqpen shekarasyndaǵy, sondaı-aq Reseı-Qazaqstan shekarasyndaǵy kóp kúndik kezek Qazaqstan, Ózbekstan, Qyrǵyzstan jáne aımaqtaǵy basqa da elderdiń júrgizýshileri birneshe kún kútýge májbúr jáne osy ýaqyttyń barlyǵy jalpy 90 kúndik lımıtke kiredi, — dep qosty depýtat.
Sondaı-aq Bolatbek Nájmetdınuly EAEO aıasyndaǵy ıntegratsııa men yntymaqtastyqty qadaǵalaıtyn Qazaqstan Respýblıkasy Premer-Mınıstriniń orynbasary Serik Jumanǵarınge resmı saýal joldaǵanyn habarlady.
Buǵan deıin Qazaqstan men Reseı shekarasyndaǵy ótkizý beketterinde júk kólikteriniń jınalyp qalýy baıqalǵany habarlanǵan bolatyn. Ol kezde Qazaqstan Respýblıkasy Kólik mınıstrligi bul jaǵdaıdy negizinen Reseı Federatsııasynyń baqylaý sharalaryn kúsheıtýimen baılanystyrǵan edi.