Reseıde vaktsınadan keıin 100-den astam ıt óldi
MÁSKEÝ.KAZINFORM — Veterınarııalyq vaktsınalar óndirýshisi «Vetbıohım» kompanııasy 2026 jyldyń jazynda «Mýltıkan-8» vaktsınasyn qoldanǵannan keıin ıtterdiń ólýine qatysty 128 jaǵdaıdy rastady. Kompanııaǵa janýar ıelerinen barlyǵy 177 ótinish túsken. Bul týraly reseılik BAQ-qa silteme jasap, agenttik tilshisi habarlaıdy.
Kompanııanyń naqtylaýynsha, 128 ótinish boıynsha janýarlardyń ólgenin rastaıtyn qujattar jınalǵan. Rastalǵan árbir jaǵdaı bir ıtke qatysty. Qalǵan ótinishter boıynsha «qujattardy rásimdeý jáne aqparatty naqtylaý jumystary júrgizilip jatyr».
Qaza tapqan janýarlardyń ıelerimen baılanys ornatý úshin «Vetbıohım» Reseı aýmaǵynda veterınarııa mamandarymen birlesip jumys uıymdastyrǵan. Árbir ótinish boıynsha jeke jumys júrgizilip, ıelerine ótemaqy tóleý jáne psıhologııalyq qoldaý kórsetý qarastyrylǵan.
Qazirgi ýaqytta 104 janýar ıesine qarjylaı ótemaqy tólenip, konsýltatsııalyq qoldaý kórsetilgen. Kompanııanyń málimetinshe, tólemder sotqa deıingi tártippen júzege asyrylyp jatyr.
Ótemaqyǵa vaktsınatsııa, emdeý jáne janýarlardy aýrýhanaǵa jatqyzý shyǵyndaryn óteý, sondaı-aq moraldyq zııan úshin tólem kiredi. Kómek mólsherin belgileý kezinde kompanııa jumsalǵan shyǵyndardy ǵana emes, janýardan aıyrylýdyń aýyrlyǵyn da eskeretinin habarlady.
«Vetbıohım» kompanııasynyń málimdeýinshe, moraldyq zııan úshin qarastyrylǵan ótemaqy mólsheri osyndaı jaǵdaılarda sottar ádette taǵaıyndaıtyn somadan joǵary bolýy múmkin. Kompanııa ótemaqynyń naqty kólemin jarııalaǵan joq.
Eske salaıyq, buǵan deıin Qyrǵyzstanda úı janýarlaryn chıpteý men tirkeý júıesin engizý usynylǵanyn jazǵan edik.
