Reseıde ýtılalym mólsheri ósti

MÁSKEÝ.KAZINFORM – Bıylǵy 1 jeltoqsannan bastap Reseıde ýtılızatsııalyq alymdy esepteýdiń jańa erejeleri kúshine endi. Jańa ádisteme boıynsha alym mólsherlemesi birneshe myń rýblden birneshe mıllıon rýblge deıin ósti.

Mundaı ósim reseılik kólik naryǵynda sheteldik kólikterdiń kúrt qymbattaýyna yqpal etti, baǵa qozǵaltqysh kólemi men qýatyna baılanysty qubylyp tur, dep habarlaıdy agenttik tilshisi.

Anyqtama: Ýtılızatsııa alymy – avtokólikterdi bolashaqta joıýdy qamtamasyz etý úshin óndirýshiler men ımporttaýshylar tóleıtin mindetti tólem. Reseılik óndirýshiler úshin bul alymdy memleket óndiristiń lokalızatsııa deńgeıine qaraı óteıdi.

Úkimet qaýlysyna sáıkes, jeltoqsan aıynan bastap ýtılalym boıynsha jeńildik mólsherlemelerin qoldaný múmkindigi shekteledi. Buǵan deıin qoldaný merzimi 3 jyldan az kólikter úshin 3400 rýbl, al 3 jyldan asqan kólikter úshin 5200 rýbl tólenetin. Endi kommertsııalyq tarıf qoldanylady: bazalyq 20 myń rýbl mólsherlemesi at kúshiniń sanyna baılanysty koeffıtsıentke kóbeıtiledi, nátıjesinde tóle mıllıon rýblden joǵary bolýy múmkin.

Qýaty 160 at kúshine deıingi kólik ıeleri úshin 3400 nemese 5200 rýbl kólemindegi jeńildikti tólemder saqtalady. Al elektromobılder men ІJQ dóńgelekke tikeleı jalǵanbaıtyn tizbekti gıbrıdter úshin esepteý elektr qozǵaltqyshynyń 30 mınýttyq shekti qýatyna nemese birneshe motordyń jıyntyq qýatyna qaraı júrgiziledi.
Ýtılalymmen qatar kedendik baj da saqtalady, onyń mólsheri qozǵaltqysh kólemine jáne kóliktiń jasyna baılanysty.

Mysaly, 1 jeltoqsannan bastap Camry kóligi úshin 173 at kúshi bar nusqaǵa ýtılalym 750 myń rýbldi quraıdy, al 2,5 lıtrlik motory bar nusqaǵa – 2 002 000 rýbl. Osyǵan baılanysty atalǵan kólik túrleriniń baǵasy da ósedi.

Premıým-klass kólikteri – 3 lıtrlik 375 at kúshi bar BMW X5 – 2,4 mln rýblge, al 4,4 lıtrlik 530 at kúshti X5 M60i nusqasy – 3 818 000 rýblge qymbattaıdy.
Bul ózgeristerdiń bastamashysy – Reseıdiń Ónerkásip jáne saýda mınıstrligi. Olar ózgeristerdiń sebebi retinde shaǵyn kólemdi, biraq tehnıkalyq erekshelikteri boıynsha joǵary baj salynatyn qýatty kólikterge uqsas kóptegen sheteldik avtomobılderdiń baryn atady. Sonyń saldarynan bıýdjet kiristi tolyq kólemde almaıdy jáne bir klassqa jatatyn kólikter ártúrli baǵalanady.

Buǵan deıin ýtılalym esebinen turmystyq qaldyq polıgondary salynatyny týraly jazdyq.