Reseıde ushaq bortynda paýerbankterdi zarıadtaýǵa tyıym salyndy
MÁSKEÝ. KAZINFORM — Reseı Kólik mınıstrligi jarııalaǵan jańartylǵan erejege sáıkes, jolaýshylar endi qýaty joǵary paýerbankterdi ushaq bortyna alyp kire almaıdy. Sondaı-aq ushý kezinde qurylǵylardy zarıadtaýǵa tyıym salyndy. Bul týraly jańartylǵan normalarda aıtylǵan, dep habarlaıdy agenttik tilshisi vedomstvoǵa silteme jasap.
Ushý kezinde qurylǵylardy zarıadtaýǵa tyıym salynǵany, al akkýmýlıatorlardy oraýǵa erekshe nazar aýdarý qajet ekendigi atap ótiledi.
Erejege saı, paýerbankter jolaýshynyń qol júginde jáne baqylaýynda bolýy tıis. Olardy júkpen tasymaldaýǵa ruqsat etilmeıdi.
Qýaty 100 Vatt-saǵatqa deıingi akkýmýlıatorlardy ushaq salonyna erkin alyp kirýge bolady. Al 100-160 Vatt-saǵat aralyǵyndaǵy qurylǵylardy tasymaldaý áýekompanııanyń kelisimimen júzege asady. Qýaty 160 Vatt-saǵattan asatyn qurylǵylardy bortqa alyp kirýge tyıym salynǵan.
Reseıdiń bes áýekompanııasy Halyqaralyq azamattyq avıatsııa uıymynyń (ICAO) normalaryna sáıkes akkýmýlıatorlardy tasymaldaý erejelerin ózgertti.
«Aeroflot» bortynda olardy tasymaldaýdyń jańa erejelerin 6 mamyrda engizdi. Júkke tapsyrýǵa tyıym salynǵanynan basqa, olardy bortta zarıadtaýǵa, sondaı-aq ushý kezinde, taksırovka jáne qoný kezinde paıdalanýǵa bolmaıtyny atap ótildi. Buǵan deıin «Rossııa», «Pobeda» jáne S7 áýekompanııalary da osyndaı sheshim qabyldaǵan. Odan keıin, 7 mamyrda Smartavia ushaq bortynda paýerbankterdi tasymaldaý erejelerin ózgertkenin jarııalady.
Osydan buryn Pegasus Airlines ushý kezinde paýerbankterdi paıdalanýǵa tyıym salǵany habarlanǵan bolatyn.
