Reseıde ushaq áýege kóterile bere jerge qulady
NUR-SULTAN. QazAqparat – TASS – Beısenbi kúni tańerteń An-2 ushaǵy RF Magadan oblysynda áýe aılaǵyna jedel qondy, sebebi ol bıiktikke kóterile almaǵan. Bul týraly TASS Reseı TJM Magadan oblystyq bas basqarmasyna silteme jasap habarlady.
«Ushaq áýege kóterilip bara jatqan kezde qulady. Onda 14 adam boldy», - dep habarlady agenttik derekkózi. Oblys úkimetiniń baspasóz qyzmetiniń málimetinshe, bortta 11 jolaýshy men úsh ekıpaj múshesi bolǵan.
TJM baspasóz qyzmetiniń sońǵy deregi boıynsha, oqıǵa saldarynan jeti adam zardap shekken. Barlyq zardap shegýshiler aýrýhanaǵa jetkizildi.
«Oqıǵa ornynda densaýlyq saqtaý mınıstri Sergeı Chekanov júr. Barlyq jolaýshylar aman-esen, tek jeńil jaraqatpen aýrýhanaǵa jetkizildi», - dep habarlady baspasóz qyzmetinen.
Óńirdiń densaýlyq saqtaý mınıstrliginiń baspasóz qyzmeti bir zardap shegýshiniń aýyr halde jatqanyn habarlady.
«Jedel járdem qyzmeti kásibı túrde tez jumys istedi. Eshkim qaza tapqan joq, balalar bolmaǵan. Qatty zardap shekken bir naýqas bar, ol qazir shokqa qarsy palatada jatyr», - dep atap ótti Magadan oblystyq densaýlyq saqtaý mınıstrliginen.
Oblys bıliginiń aldyn ala deregi boıynsha, ushaq Magadan oblysynda Srednekansk qalalyq okrýgi aýmaǵynda jumys isteıtin jeke kompanııaǵa tıesili. Bortta vahtaǵa bara jatqan kompanııa qyzmetkerleri bolǵan.
Ushaq Seımchan kentine barýy tıis bolǵan. Qutqarýshylardyń málimetinshe, ushaq 10 metr bıiktikten qulaǵan. Oqıǵanyń mán-jaıy anyqtalyp jatyr.
