Reseıde úsh bank «Ivolga-Holdıng» qazaqstandyq agrokompanııanyń múlki úshin daýlasýda
ASTANA. QazAqparat - Reseıde Sberbank, Rosselhozbank jáne Royal bank of Scotland (RBS) qazaqstandyq "Ivolga-Holdıng" agrokompanııasynyń múlki úshin daýlasyp jatyr. Tıisti aqparat tórelik sottyń sheshimder kartotekasynda bar, dep habarlady TASS.
RBS 2015 jyldyń mamyrynda Chelıabi oblysynyń tórelik sotyna "Ivolga" qurylymdarynan $296,6 mln kólemindegi qaryzdy óteý boıynsha júgingen. Nesıelik jeli 2007 jyly ashylǵan. Bulshaǵym boıynsha sot 38 mln. dollarǵa Chelıabi, Kýrsk, Orynbor oblystaryndaǵy agroholdıngtiń kásiporyndaryna tyıym salǵan
Rosselhozbank, "Ivolga" boryshyn 139,4 mln rýblge baǵalap otyr. Tórelik sotqa holdıngtiń basty "Ivolga-Tsentr" kompanııasynan jáne onyń óndiristik aktıvterinen qaryzdy óndirý boıynsha shaǵymdanǵan.
Kýrsk oblysynyń tórelik soty "Ivolga" qurylymdaryna qatysty Sberbanktyń jazǵan aryzyn da qarastyryp jatyr. Sot "Sahar Zolotýhıno" jáne "Zolotýhınskoe agroobedınenıe" kásiporyndarynda ýaqytsha baqylaý júrgizýde. Sberbank aldyndaǵy qaryzynyń jalpy quny 1,1 mlrd rýbldi quraıdy. Sberbank sottan agroholdıngtiń ózge de birqatar qurylymdaryn bankrot dep sheshýin surady. Sberbank Qazaqstan azamaty Vasılıı Samoılovıch Rozınovqa qatysty da shaǵym jasady.
Qazaqstandyq "Ivolga-Holdıng" JShS bas dırektory jáne ıesi Vasılıı Rozınov Forbes nusqasy boıynsha Qazaqstandaǵy eń baı adamdardyń arasynda 19 orynda. Onyń dáýleti $329 mln. baǵalandy.
BELF konsaltıng kompanııasynyń basqarýshy dırektory Vladıslav Novoselov holdıngtiń Reseıdegi Chelıabi, Kýrsk, Orynbor oblystaryndaǵy jerin 550 myń ga aýmaqqa baǵalap otyr. Bul kórsetkish boıynsha kompanııa Reseıde 2-orynda.
Kompanııa týraly ashyq aqparat joq. Óıtkeni onyń aqparattyq saıasaty jabyq bolyp tabylady.
Qazaqstandyq "Ivolga-holdıngtiń" resmı saıty qalypqa keltirilýde, Kýrsk oblysyndaǵy qurylymnyń menedjmentimen baılanys ornatý ázirge múmkin emes. Sberbank pen Royal bank of Scotland TASS-tyń aktıvterdi satyp alatyndar tabyldy ma degen suraǵyna jaýap bermedi.
Kýrsk oblysyndaǵy kompanııanyń qant ósirý baǵytynyń damý múmkindikteri bar, dep atap ótti Soıýzrossahar basshysy Andreı Bodın. Onyń pikirinshe Qazaqstanda ornalasqan bas kompanııanyń jaǵdaıy múshkil.
Reseılik "Ivolga-Tsentr" qurylymyna 40-tan astam kásiporyn kiredi, delingen kompanııanyń saıtynda. Kompanııa qyzmetiniń negizgi baǵyttary eginshilik, mal sharýashylyǵy, aýyl sharýashylyq ónimderin óńdeý jáne azyq-túlik óndirisi. Onyń quramyna An-2 15 ushaǵy bar "AVIAHIM" avıakompanııasy kiredi.
