Reseıde urlanǵan kólikterdi Tájikstanǵa alyp ótpek bolǵan sheteldikter ustaldy
TÚRKІSTAN. QazAqparat - Túrkistan oblysynyń Saryaǵash keden beketinde urlanǵan avtokólikterdi óz elderine alyp ótpek bolǵan Tájikstan azamattary ustaldy. Ustalǵandar Reseıde urlaǵan avtokólikterimen birge Saryaǵash aýdandyq ishki ister bólimine tapsyryldy, dep habarlaıdy QazAqparat tilshisi.
UQK Shekara qyzmetiniń málimetinshe, Saryaǵash shekara jasaǵynyń shekarashylary «Jibek joly-avto» bólimshesinen urlanǵan kólikter ótetini jóninde aldyn ala habardar bolǵan.
«Úsh Tájikstan azamaty Óbekstanǵa qaraı «Hıýndaı Solıarıs» jáne «Kıa Rıo» avtokólikterimen ótpek bolǵan. Sóıtip Reseı Federatsııasy aýmaǵynda urlanǵan avtokólikterdi óz elderine tranzıtpen, Qazaqstan arqyly jetkizýge árekettengen» delingen habarlamada.
Shekarashylar sondaı-aq, «Qorǵas» shekaralyq baqylaý jasaǵynyń aýmaǵynda 22 jastaǵy qazaqstandyqtan deklaratsııalanbaǵan, jalpy salmaǵy 30 kg-dan asatyn júk taýaryn anyqtaǵan.
«Deklaratsııalanbaǵan taýardyń arasynda uıaly telefonnyń kerek-jaraqtary, «smart-saǵattar», symsyz qulaqqaptar t.b. zattar bolǵan. Barlyq taýarlar aktimen «Altynkól» keden beketine tapsyryldy. Qorǵastyq shekarashylar keshe taǵy da 22 kg ıesiz qytaı dári-dármegin taýyp, kedenshilerge ótkizdi» delingen UQK Shekara qyzmetiniń baspasóz habarlamasynda.
