Reseıde ulty qazaq polkovnık granatany denesimen jaýyp, sarbazdardy aman alyp qaldy - BAQ
ASTANA. QazAqparat - Reseıdiń áskerı polıgonynda qazaq polkovnıgi granatany denesimen jaýyp, qasynda bolǵan sarbazdardy qutqaryp qaldy. Eń ǵajaby, ony ózi jarylystan aman qalǵan, dep jazady «Ekspress-K» basylymy.
Sverdlovsk oblysynyń Lesnoe qalasynda Іshki áskerdiń 3275 áskerı bólimindegi oqý-jattyǵýlar kezinde kishi serjant Telenın qolyndaǵy RGD-5 granatasyn túsirip alǵan. Sol jerde bolǵan bólim komandıri, polkovnık Serik Sultanǵabıev oılanbastan granatany denesimen basyp qalady. Sonyń arqasynda jarylystan sarbazdardyń eshqaısysy zardap shekpegen, biraq olardyń qutqarýshysy, komandır aýyr jaralanady. Polkovnık Sultanǵabıev jedel jan saqtaý bólimine jetkizilip, oǵan Ekaterınbýrgten arnaıy tikushaqpen kelgen Reseı ІІM Іshki áskeri, 5-shi áskerı gospıtali dárigerleriniń reanımatsııalyq brıgadasy ota jasap, polkovnıkti aman alyp qalady. Basylymnyń jazýynsha, mamandar Sultanǵabıevtyń ómirine qaýip joq ekenin aıtty.
