Reseıde turatyn qazaqtyń Astanada sýret kórmesi ashyldy

Ádil Áýbákirov Reseıdiń qazaǵy, Astrahannan kelgen jas sýretshi, Máskeýde, Sankt-Peterbýrgte, Sen-Tropede jáne t.b. ótken jeke jáne toptyq kórmelerdiń múshesi. Bul kórme onyń Astanadaǵy, ıaǵnı óziniń tarıhı otanyndaǵy alǵashqy jumys tájirıbesi bolyp otyr. Qazaqstanǵa alǵash ret ótkiziletin «Astana Art Show» halyqaralyq kórmesine qatysýǵa kelgen ol jeke kórmeni ótkizý arqyly halqynyń mádenıeti men tarıhy týraly kóbirek bilýge umtylady.

«Meniń ónerime degen baǵyt óz tarıhymnan, ejelden bastaý alatyndaı. Kerek deseńiz, shamanızm máninen syr tartyp, ózimdi tabıǵatpen biriktiretin tyń dúnıeni ómirge ákelgim keledi. Shabyt kelip, kezekti týyndyńa kiriskende boıdaǵy óner bılegen osynaý talap-tilekke eshqandaı qarsylyq kórsete almaısyń. Sýretterimniń negizin klassıkalyq tehnıkamen salamyn. Alaıda sýret ónerine men zamanǵa saı kózqaraspen, tyńǵa túren salyp qaraǵym keledi. Dástúrli oıý-órnekterdi qoldanýdan buryn zamandastaryma tyń týyndy usynǵym keledi», - deıdi sýretshi. 

Ádil Áýbákirov óz sózinde atap ótkendeı, túrli-tústi boıaý arqyly sýretshi óziniń ishki dúnıesin syrtqa shyǵara alady.

«Sýret salǵan kezde men ótkenmen dıalog quramyn. Demek, eski mádenıetterdiń oshaqtaryn izdeıtin sekildimin. Qazaqstanǵa alǵash jazda kelgen edim. Ekinshi ret jolym mine búgin túsip otyr. Munda kún sýyq bolǵanymen, adamdardyń kóńili jylylyq syılaıdy», - deıdi ol.

Sýretshi óz sózinde týyndylary Frantsııa men Ispanııa elderinde jármeńkelik kórmelerge qatysqanyn aıtady.

«Týyndylardy dúnıege ákelýdi maqsat tutamyn. Biraq, jumysym keshendi bolǵanyn qalar edim. Eń bastysy sýret oıly túrde salynýy kerek. Oıly sýret óz ornyn tabady. Shabytymdy sharyqtatý úshin mototsıklmen dalany kezetin ádetim bar. Keń kósilgen kermıyq dalada jelmen jarysyp kele jatqanda sýret degen oı bolyp sanańdy úıiredi. Bala kezden atam dala qasıetin, mádenıetin sezdirýge tyrysty. Ósken shaqta ǵana osynaý dala qasıeti maǵan qanshalyqty áser etkenin ańǵarǵandaı boldym. Josparym - jalǵastyrý, Uly dalany madaqtaýdy jalǵastyrý», - deıdi sýretshi. 

Elorda turǵyndaryna Ádil «Taǵdyr jazýy» taqyryby boıynsha sýretterin usynyp otyr. Sýretshiniń aıtýynsha, syrtqy álem - bul bolmystyń tolyqtyǵy emes, zerttelmegen úlken bútin dınamıkalyq sulba.

Sýretshiniń nazarynda adam, tús, syzyq, sıýrrealızm, ekspressııa, abstraktsııa bar. Osynyń bári óziniń jarqyn jáne emotsııalyq sýretterinde sıqyrly túrde biriktiriledi. Ol óz jumystaryn bir stılde shekteýdi jón kórmeıdi eken.

«HHІ ǵasyrdyń sýretshisi Ádil Áýbekirov taǵdyr belgilerin joramaldy ǵylymdardan emes, óz ónerinen izdeıdi. Sulýlyq onyń júreginde, sol sulýlyqty álemge taratý sátin kútip júr sýretshi», - deıdi kórme kýratory Erjan Aqataev.

Astana turǵyndary men qonaqtary atalmysh kórmeni 2019 jyldyń 12 qańtaryna deıin tamashalaı alady. Kórmege kirý tegin.  

Fotosýret: astana.gov.kz