Reseıde tumaýdan 27 adam kóz jumdy
ASTANA. QazAqparat - Reseıde jyl basynan beri tumaý saldarynan 27 adam kóz jumdy. Bul týraly TASS RF Densaýlyq saqtaý mınıstriniń orynbasary Tatıana ıAkovlevaǵa silteme jasap habarlady.
"18 qańtardaǵy jaǵdaı boıynsha tumaý saldarynan qaıtys bolǵandar sany - 27 adamǵa jetti. Negizinen bul tıisti ekpe jasamaǵandar jáne dárigerge ýaqytynda barmaǵandar," - dedi ol. Tumaýdan kisi óliminiń kóbi Peterborda tirkeldi.
ıAkovlevanyń sózine qaraǵanda, dońyz tumaýynyń vırýsy joǵarǵy tynys joldaryn zaqymdap, qan quramyn ózgertedi de, qan uıyǵyn týdyrady.
"Birinshi táýlikten-aq tumaýǵa qarsy preparattarmen emdele bastaǵan mańyzdy," - dep eske saldy ol.
Reseıdiń Tutynýshylardy qorǵaýdy qadaǵalaý qyzmetiniń basshysy Anna Popova tumaýdy ózdiginshe emdemeý, dereý dárigerdiń kómegine júginý kerektigin aıtty. Óıtkeni qazirgi tumaý vırýsynyń belgili bir erekshelikteri bar.
"Tumaý belgileri paıda bolǵanda birden dárigerge qaralý kerek. Naýqas óz betinshe qandaı tumaýdy juqtyrǵanyn anyqtamaq bolyp, buǵan ýaqytty ketirmegeni jón. Ózdiginshe emdelý de durys emes", - dep eskertti Popova.
Dárigerdiń kómegine ýaqytynda júgingende ǵana aǵzaǵa aýyr tıetin jaǵdaıdyń aldyn alýǵa bolady, dep atap ótti Popova. Dúnıejúzilik densaýlyq saqtaý uıymynyń (DDSU) aqparatynsha, bıyl Eýropa men Reseı aýmaǵyndaǵy tumaýdyń 80%-y - A(H1N1), nemese dońyz tumaýy eken.
