Reseıde tyńaıtqysh qaldyqtaryn jol qurylysyna paıdalanbaq

ASTANA. KAZINFORM - Reseı ekologııalyq operatory (REO) Reseıdiń Tabıǵı resýrstar jáne ekologııa mınıstrligimen birlesip, mıneraldy tyńaıtqyshtar óndirisiniń qaldyǵy – fosfogıpsti ekinshi aınalymǵa tartýǵa múmkindik beretin keshendi jospar ázirledi, dep habarlaıdy REO saıty.

Habarlamada aıtylǵandaı, qujat jaqyn arada Úkimet qaraýyna engiziledi. Josparǵa sáıkes, fosfogıpstiń qoldanylý aýqymy keńeıtiledi. Ony jol salýda, aýyl sharýashylyǵynda, qaldyqtardy ornalastyrý nysandaryn rekýltıvatsııalaýda qoldanýǵa bolady.

Reseıdiń tabıǵı resýrstar jáne ekologııa vıtse-mınıstri D.Býtsaevtyń aıtýynsha, fosfogıps jol qurylysy úshin mańyzdy resýrsqa aınalýy múmkin. Onyń qoldanylýy jol jabyndylardyń beriktigin arttyrady jáne iri kólemdegi ónerkásiptik qaldyqtardy aınalmaly ekonomıkaǵa tartýǵa kómektesedi.

– Bul biz qaldyqty resýrsqa aınaldyra otyryp, ekologııa men ınfraqurylymdy damytý mindetterin qatar sheshe alatynymyzdyń bir mysaly, – dedi sheneýnik.

Fosfogıps – mıneraldy tyńaıtqysh óndirý kezinde paıda bolatyn hımııa ónerkásibiniń qosalqy ónimi. Ol eń kóp taralǵan ónerkásiptik qaldyqtardyń qataryna jatady. Degenmen, onyń qoldaný múmkindigi keń: materıaldy jol, trotýar, velosıped joly, sport jáne balalar alańdaryn salýda paıdalanýǵa bolady.

REO bas dırektory I.Tarasovanyń aıtýynsha, fosfogıpsti qoldaný tájirıbesi Lenıngrad jáne Saratov oblystarynda sátti júzege asyrylǵan. Saratov oblysynyń Balakovo aýdanynda jalpy aýdany 180 myń sharshy metr bolatyn pılottyq jol ýchaskeleri salynǵan.

Sonymen qatar, fosfogıpsti qaldyqtardy ornalastyrý nysandaryn rekýltıvatsııalaý barysynda qoldanýdyń da oń tájirıbesi bar. Mundaı tehnologııalar memlekettik ekologııalyq saraptamanyń oń qorytyndysyn aldy.

Buǵan deıin 36 mln tonn fosfogıpS Taraz turǵyndaryna qaýip tóndirýde dep jazǵanbyz.