Reseıde terakt jasaýshylardyń 80%-y – 35 jasqa deıingi jastar
ASTANA. KAZINFORM – Reseıde terrorıstik sıpattaǵy qylmystardyń shamamen 80%-yn 35 jasqa deıingi adamdar jasaıdy, dep habarlaıdy TASS.
Bul týraly Reseıdiń Ulttyq antıterrorlyq komıtetiniń resmı ókili Andreı Prjezdomskıı málimdedi.
Onyń aıtýynsha, sońǵy jyldary terrorıstik áreketterge qatysýshylardyń jasy aıtarlyqtaı jasaryp ketken.
– Terrorıstik kontıngenttiń «jasaryp» bara jatqany baıqalady. Qazir mundaı qylmystardyń 80%-y, tipti odan da kóbi 35 jasqa deıingi adamdar tarapynan jasalady, – dedi Andreı Prjezdomskıı.
Ol alǵash ret mundaı jaǵdaıdy Hasavıýrtte baıqaǵanyn aıtyp, sol kezde iri terakt uıymdastyrýǵa qatysy bar toptyń jetekshisi retinde 18 jastaǵy jas jigittiń ustalǵanyn mysalǵa keltirdi.
Prjezdomskııdiń sózinshe, qazirgi tańda mundaı jaǵdaılar sırek qubylys emes, kerisinshe qalypty úrdiske aınalǵan.
Sondaı-aq ol jastardy terrorıstik áreketterge tartý barysynda olardyń psıhologııalyq jáne jas erekshelikteri paıdalanylatynyn atap ótti. Atap aıtqanda, tolyq qalyptaspaǵan dúnıetanym, qundylyqtar júıesi men synı oılaý qabiletiniń álsizdigi olardy qaýip-qaterdi der kezinde baǵalaýdan shekteıdi.
Aıta keteıik, buǵan deıin Reseıdiń áskerı shyǵyny 190 mlrd dollarǵa jetkeni habarlandy.
