Reseıde Telegram jumysyna qoıylǵan shekteýler saqtalady

ASTANA. KAZINFORM – Reseıdiń baılanys jáne aqparat salasyndaǵy federaldyq qyzmeti Telegram messendjeri jumysyna qoıylǵan shekteýlerdi reseılik zańnama buzýshylyqtary joıylǵanǵa deıin jalǵastyratynyn málimdedi. Bul týraly vedomstvonyń baspasóz qyzmeti habarlady, dep jazady TASS.

Roskomnadzordyń málimdeýinshe, vedomstvo otandyq jáne sheteldik ınternet-resýrstarmen jumys isteýge ashyq, alaıda ol úshin Reseıge jáne onyń azamattaryna qurmetpen qaraý sharty saqtalýy tıis.

Sonymen qatar Telegram-ǵa tyıym salynǵan kontentti joıýdan bas tartý jáne ózin-ózi baqylaý týraly zań talaptaryn saqtamaý baptary boıynsha jalpy somasy 64 mln rýblge deıin aıyppul salynýy múmkin. Bul aqparatty Máskeýdegi Tagan aýdandyq soty rastaǵan.

Messendjer jumysyna qatysty shaǵymdar sany da artyp otyr. Downdetector servısiniń derekterine sáıkes, sońǵy táýlikte Telegram jumysyna baılanysty 11 myńnan astam shaǵym tirkelgen. Máskeý ýaqytymen 13:05-tegi jaǵdaı boıynsha sońǵy bir saǵatta 900-den asa qoldanýshy shaǵym túsirgen.

Shaǵymdardyń eń kóp bóligi Magadan oblysynan, ıAmal-Nenets avtonomdy okrýginen, Samara jáne Túmen oblystarynan, sondaı-aq Máskeý qalasynan kelip túsken.

Downdetector málimetinshe, paıdalanýshylardyń 31 paıyzy habarlandyrýlardyń isten shyqqanyn, 26 paıyzy mobıldi qosymshadaǵy aqaýlardy, 22 paıyzy jalpy júıelik isten shyǵýdy, al 15 paıyzy saıt jumysynyń buzylǵanyn kórsetken.

Reseı bıligi Telegram jumysyna qoıylǵan shekteýler zań talaptary tolyq oryndalǵanǵa deıin saqtalatynyn atap ótti.

Aıta keteıik, Reseı balalarǵa arnalǵan qantty sýsyndar jarnamasyna tyıym salýy múmkin.