Reseıde tártip buzǵan mıgranttardy elden shyǵarý kórsetkishi 17%-ǵa ósti

MÁSKEÝ.KAZINFORM - 2024 jyly Memlekettik Dýma kóshi-qon saıasaty salasynda 21 zań qabyldady, onyń 17-sin depýtattar usynǵan. Zańsyz kóshi-qondy tejeý júıesi jasaldy. Bul týraly parlament tóraǵasy Vıacheslav Volodın óziniń Telegram-arnasynda habarlady, dep jazady agenttiginiń tilshisi.

Volodınniń aıtýynsha, jańa normalardyń nátıjesinde zańsyz kóshi-qondy uıymdastyrý jáne mundaı qylmystarǵa qatysý úshin jaýapkershilik kúsheıtildi. Quqyq qoldaný tájirıbesiniń taldaýy – qabyldanǵan normalardyń tıimdiligin kórsetti. Bul úshin 15 jylǵa deıin bas bostandyǵynan aıyrý jazasy qarastyrylǵan.

Reseıdiń ІІM derekterine sáıkes, 2025 jyldyń alǵashqy 6 aıynda:

• zańsyz kóshi-qondy uıymdastyrý boıynsha (RF QK 322.1-baby) anyqtalǵan qylmystar sany 7,2%-ǵa artqan.

• shetel azamattarynyń Reseıge kirý erejelerin nemese elde bolý tártibin buzý faktilerin toqtatý kórsetkishi 27,9%-ǵa kóbeıgen.

Ýaqytsha turýǵa berilgen ruqsattar sany 31,6%-ǵa, turýǵa yqtııarhattar – 32,2%-ǵa azaıǵan. Reseı Federatsııasynan tártip buzǵan mıgranttardy elden shyǵarý kórsetkishi 17%-ǵa ósken (2024 jyldyń osyndaı kezeńimen salystyrǵanda). Sonymen qosa, Volodın 791 adamnyń Reseı azamattyǵynan aırylǵanyn atap ótti.

Aıtap ótetin jaǵdaı, 2025 jylǵy 11 tamyzda 31.07.2025 j. №316-FZ Federaldyq zańy kúshine endi, ol Reseı azamattyǵyn toqtatý negizderin keńeıtti (barlyǵy – 80). Tizimge QK-niń 14 babyndaǵy 20-dan astam quram qosyldy.

Kóshi-qon zańnamasyn qatańdatý ázirge Reseıge kelýshiler sanyna áser etken joq. Elge Qytaı, Ózbekstan, Tájikstan, Qyrǵyzstan jáne Qazaqstan azamattary kelip jatyr.

Volodın sondaı-aq osy baǵytta taǵy birqatar bastamalar ázirlený ústinde ekenin atap ótip, «sizderdiń usynystaryńyzdy da kútemin» dep jazdy.

Osyǵan deıin Reseı Federatsııasynyń kóshi-qon zańdaryn buzyp júrgen sheteldikterge óz mártebesin zańdastyrýǵa nemese elden shyǵýǵa bir aı ýaqyt qalǵany týraly jazdyq.