Reseıde tabylǵan qazaq maıdangeriniń súıegi elge jetkiziledi

MÁSKEÝ. QazAqparat - Máskeýde Ekinshi dúnıejúzilik soǵysta qaza tapqan qazaqstandyq jaýyngerdiń súıegin tapsyrý rásimi ótti. QazAqparat bul týraly Qazaqstannyń Reseıdegi Elshiligine silteme jasap habarlaıdy.

Elshilik ǵımaratynda ótken dıplomattar men elshilik janyndaǵy Áskerı attashe keńsesiniń qyzmetkerleri, Novgorod oblysy gýbernatorynyń birinshi orynbasary Evgenıı Bogdanov jáne reseılik izdeý qozǵalysynyń ókilderi qatysty.

Qaldyqtardy ótken jazda Novgorod oblysynyń Demıanskıı aýdanynda «Nahodka» izdeý otrıadynyń jaýyngerleri tapqan. Soldattyń medalonyndaǵy jazba jaqsy saqtalǵandyqtan, onyń jeke basyn anyqtaý múmkin bolǵan.

«Ol 1916 jyly Ońtústik Qazaqstan oblysy Jýaly aýdanynda (qazirgi Jambyl oblysy Jýaly aýdany) týǵan Saparbaı Imahaev bolyp shyqty. 1939 jyly Saıram RVK áskerine shaqyrylyp, 1943 jyly qańtarda habarsyz ketken.

Qazaqstan Respýblıkasynyń Reseı Federatsııasyndaǵy elshiligi men «Atamnyn Amanaty« qoǵamdyq birlestiginiń kómegimen jaýyngerdiń týystary tabyldy. Jaqyn arada onyń súıegi týǵan jerine jetkizilip, qurmetpen jerlenetin bolady», - delingen habarlamada.

Qazaqstannyń Reseıdegi elshiliginiń áskerı attashesi Erjan Ermekbaevtyń aıtýynsha, Imahaevtar otbasynda úsh aǵaıyndynyń Ábdibaıy soǵystan oralǵan, al Saparbaı men Ábish habarsyz ketken. Osy kezge deıin aldymen anasy Dana, keıin týystary olar týraly málimet izdegenimen, nátıje bolmaǵan.

Jaýyngerlerdiń súıekterin tabý boıynsha qazaqstandyq jáne reseılik izdeý toptarynyń birlesken jumysy aldaǵy ýaqytta jalǵasatyn bolady.

Foto: kazembassy.ru