Reseıde Sý-30 ushaǵy apatqa ushyrady
MÁSKEÝ. TASS - QazAqparat – Tverskaıa oblysynda seısenbi kúni Sý-30 ıstrebıteli josparly oqý-jattyǵý ushýyn ótkizip jatqanda apatqa ushyrap, ushaq ekıpajy katapýltalandy, dep habarlaıdy QazAqparat TASS agenttigine silteme jasap.
«22 qyrkúıekte Tverskaıa oblysynda josparly oqý-jattyǵý ushýyn ótkizip jatqan Batys áskerı okrýginiń Sý-30 ushaǵy apatqa ushyrady. Ekıpaj sátti katapýltalanyp, jerge qonǵannan keıin ushqyshtar baılanysqa shyqty», - delingen habarlamada.
Okrýg málimeti boıynsha, qazirgi ýaqytta ekıpaj músheleri evakýatsııalandy.
Málimet boıynsha, ıstrebıtel ormandy jerge qulaǵan. «Ushaq ormandy jerge qulady. Jerde eshteńe qıraǵan joq», - dep atap ótti baspasóz qyzmeti.
Tótenshe jaǵdaı sebepterin anyqtaý úshin ushaqtyń qulaǵan ornyna arnaıy komıssııa shyqty.
