Reseıde stýdentterdiń 2 paıyzy Qorǵanys mınıstrligimen kelisimshartqa otyrýy tıis

2026 jyldyń basynda ótken jabyq jıynda Reseıdiń ǵylym jáne joǵary bilim mınıstri Valerıı Falkov iri ýnıversıtetterdiń rektorlaryna stýdentterdiń keminde 2%-yn Qorǵanys mınıstrligimen kelisimshartqa otyrǵyzý qajet ekenin aıtqan.

Derekkózderdiń aıtýynsha, bul talap barlyq oqý oryndaryna ortaq jospar retinde usynylǵan.

Táýelsiz reseılik BAQ-tyń jazýynsha, stýdentter arasynda áskerı qyzmetke úgit-nasıhat 2025 jyldan bastap kúsheıgen. Qorǵanys mınıstrligi jetekshi ýnıversıtetterdiń stýdentterine tikeleı kelisimshartqa otyryp, dron operatorlary retinde qyzmet etý múmkindigin usynyp jatyr. Onyń ornyna joǵary mólsherdegi tólemder, «urys aımaǵynan alys jerde» oqý jáne bir jyldan keıin ýnıversıtetke qaıta oralý múmkindigi ýáde etiledi.

Stýdentter negizinen byltyr qurylǵan ushqyshsyz júıeler áskerine shaqyrylǵan. Jalpy, Qorǵanys mınıstrligi bul jańa qurylymǵa shamamen 78,8 myń adam tartýdy josparlap otyr.

Resmı derekterge sáıkes, ótken jyly Reseı joǵary oqý oryndarynda 2,2 mıllıon er adam bilim alǵan. Eger 2% jospary oryndalsa, armııa qatary shamamen 44 myń jaspen tolyqpaq. Al eger bul talap kolledjderge de qatysty bolsa, jalpy sany 76 myń adamǵa deıin jetýi múmkin.

Stýdentterge kelisimsharttan keıin oqýyn jalǵastyrýǵa múmkindik beriletini, sondaı-aq Ýkraınadaǵy soǵysqa qatysýshylarǵa beriletin memlekettik tólemder men jeńildikter usynylatyny aıtylǵan. Іri ýnıversıtetter, sonyń ishinde Máskeý memlekettik ýnıversıteti men Sankt-Peterbýrg memlekettik ýnıversıteti qosymsha qarjylaı qoldaý kórsetýge ýáde bergen.

Qazirgi ýaqytta oqý oryndarynda áskerı qyzmetti nasıhattaý tek jarnamalyq plakattarmen shektelmeı, stýdentter «mańyzdy taqyryptar» kezdesýlerine jáne «erlik sabaqtaryna» shaqyrylýda. «Verstka» basylymynyń dereginshe, Reseı boıynsha 200-den astam osyndaı úgit sharasy ótken.

Quqyq qorǵaýshylar kelisimshartqa otyrǵan jastar qajetti talaptarǵa saı kelmese nemese dron operatorlyǵy boıynsha jumysqa jiberilmese, olardy basqa áskerı bólimderge aýystyrýy múmkin ekenin eskertedi.

Kásiporyndarǵa da mindet júkteldi

Reseıdiń Rıazan oblysynda bılik jumys berýshilerge de áskerı kelisimshartqa adam tartý mindetin júktegen.

Conflict Intelligence Team jarııalaǵan qujatqa sáıkes, oblys gýbernatory Pavel Malkov kásiporyndarǵa naqty tapsyrmalar bergen:

• 150–300 qyzmetkeri bar uıymdar – 2 adam,

• 300–500 qyzmetkeri bar uıymdar – 3 adam,

• 500-den kóp qyzmetkeri bar uıymdar – 5 adam áskerı kelisimshartqa tartýy tıis.

Bul sheshim Reseı prezıdenti Vladımır Pýtınniń 2022 jylǵy jarlyqtaryna negizdelgen. Qujatta óńir basshylaryna armııa qajettilikterin qamtamasyz etý boıynsha ókilettik berilgen.

Sonymen qatar, bul talaptardy oryndamaǵan kásiporyndarǵa qandaı jaýapkershilik qarastyrylatyny naqty aıtylmaǵan.