Reseıde «Spýtnık V» vaktsınasyn saldyrǵan 3 dárigerden koronavırýs anyqtaldy
BARNAÝL. TASS-QazAqparat – Altaı ólkesinde «Spýtnık V» vaktsınasy alǵashqylardyń biri bolyp saldyrǵan úsh dárigerden koronovırýs anyqtaldy. Bul týraly QazAqparat TASS agenttigine silteme jasap habarlaıdy.
«Altaı ólkesinde koronavırýs ınfektsııasyna qarsy ekpe («Spýtnık V « vaktsınasy) saldyrǵan 42 dárigerdiń úsheýi koronavırýs juqtyrǵan. Vaktsınatsııalaýdan ótken, aýrýǵa shaldyqqan dárigerlerdiń ımmýnıteti COVID-19 qozdyrǵyshymen kezdesý kezinde qalyptasyp úlgermegen bolýy múmkin. Tek bul dárigerlerdiń aýrý juqtyrýynyń sebebi bolýy yqtımal», - delingen vedomstvo taratqan habarlamada.
Basqarma habarlaǵandaı, ekpeni ázirleýshilerdiń málimeti boıynsha, vaktsına eki komponentti: adam birinshi ekpeni saldyrǵannan keıin úsh apta ótken soń ekinshisin alady. Adam ekinshi vaktsınatsııadan keıin úsh apta ótken soń ǵana vaktsınatsııalanǵan jáne sáıkesinshe koronavırýs ınfektsııasynan qorǵalǵan dep sanalady. Óıtkeni osy ýaqyt ishinde ımmýnıtetti qalyptastyrý protsesi júredi.
Óńirdiń bas ınfektsıonısti málimdegendeı, koronavırýsqa qarsy vaktsınanyń 2 myńǵa jýyq doza kólemindegi ekinshi partııasy Altaı ólkesine 2021 jyldyń birinshi toqsanynda jetkiziledi.
Jedel shtabtyń málimeti boıynsha ótken táýlikte Altaı ólkesinde vırýsqa shaldyǵýdyń 234 jańa jaǵdaıy tirkelgen. Pandemııa bastalǵaly óńirde jalpy sany 21 499 adam koronavırýs juqtyrǵan.
Eske salsaq, AQSh, Italııa jáne basqa elderdiń ýnıversıtetterinen zertteýshiler reseılik «Spýtnık V» vaktsınasyna qatysty The Lancet jýrnalynyń redaktsııasyna hat jazyp, preparatty synaý nátıjelerinde statıstıkalyq aýytqýlar bar ekendigin aıtqan edi. Oǵan Reseıdegi ǵalymdar jaýap berdi.
