Reseıde Qyrǵyzstan, Ózbekstan jáne Tájikstan azamattary qamaýǵa alyndy
RF ІІM Astrahan oblysy boıynsha basqarmasyna medıtsınalyq mekemeden astrahandyq 20 adamnyń belgisiz zattan ýlaný belgilerimen jansaqtaý bólimine túskeni týraly aqparat kelip tústi, dep habarlaıdy Kazinform Reseı Federatsııasy Іshki ister mınıstrliginiń Astrahan oblysy boıynsha basqarmasy baspasóz qyzmetine silteme jasap.
Reseı quqyq qorǵaý organynyń málimetinshe, 4 adam belgisiz dáriden ýlanyp qaıtys bolǵan, 20 adam jansaqtaý bóliminde jatyr.
Atalǵan faktiler negizinde Reseı ІІM Astrahan qalasy boıynsha tergeý basqarmasynyń aqparattyq jáne telekommýnıkatsııalyq tehnologııalar, esirtki bıznesi jáne ekonomıkalyq qylmysqa qarsy kúres basqarmasynyń tergeýshisi tarapynan qylmystyq is qozǵaldy.
«Tótenshe izdestirý sharalary barysynda Reseı ІІM oblystyq bas basqarmasynyń Esirtkige qarsy kúres basqarmasynyń qyzmetkerleri oqıǵaǵa qatysy bolýy múmkin bolǵan esirtkini zańsyz satýǵa kúdikti tulǵalardy anyqtady. Qyrǵyzstan, Ózbekstan jáne Tájikstannyń 3 azamaty Stavropol ólkesinde polıtsııa tarapynan tutqyndalyp, Astrahanǵa jetkizildi», - delingen habarlamada.
Qajetti saraptamalar, sonyń ishinde genetıkalyq saraptamalar júrgizilip jatyr. Oqıǵanyń mán-jaıyn anyqtaý maqsatynda tergeý isteri men jedel sharalar jalǵasýda. Zańsyz áreketke qatysy bar tulǵalar, sondaı-aq ómirge qaýip tóndiretin tyıym salynǵan zattardy tutynǵan basqa da adamdar anyqtalyp jatyr.
«Esirtkilerdi zańsyz aınalymnan tolyǵymen alyp tastaý sharalary júrgizilýde», - dedi Reseı ІІM resmı ókili Irına Volk.
