Reseıde SIM-karta IMEI-kodqa bekitiledi

MÁSKEÝ.KAZINFORM - Reseıde mobıldi qurylǵylardyń sáıkestendirý nómirleri (IMEI) derekqorynyń jumys isteý negizderin aıqyndaıtyn zań jobasy qabyldandy, dep habarlaıdy Kazinform agenttiginiń menshikti tilshisi.

Bul bastama kıberalaıaqtyqqa qarsy is-qımyl sharalarynyń ekinshi paketi aıasynda júzege asyrylyp otyr. Mobıldi qurylǵylardy elge ákelý kezinde árbir qurylǵyǵa 15 tańbaly IMEI-nómir beriledi, ol qurylǵyny sáıkestendirýge múmkindik beredi. Atalǵan nómirler arnaıy derekqorǵa engiziledi. Onyń jumys tártibin Reseı Úkimeti belgileıdi.

Kelisimshart jasasý barysynda mobıldi operator klıenttiń smartfonynyń IMEI-nómirin qujatta kórsetýge mindetti bolady. Qaı SIM-kartanyń qaı qurylǵyda paıdalanylyp otyrǵany týraly málimetter biryńǵaı derekqorǵa jiberiledi. Eger mobıldi qurylǵynyń ıdentıfıkatory derekqorda bolmasa nemese SIM-karta basqa qurylǵyǵa tirkelgen bolsa, operatorlarǵa baılanys qyzmetterin kórsetýge tyıym salynady.

Nátıjesinde SIM-karta tek bir ǵana qurylǵyǵa bekitiletin bolady.

Buǵan deıin Memlekettik Dýmanyń memlekettik qurylys jáne zańnama komıteti shetel azamattary men azamattyǵy joq adamdarǵa SIM-kartalardy telefonnyń IMEI-nómirine baılamaı satqany úshin qylmystyq jaýapkershilik engizýdi kózdeıtin úkimettik zań jobasyn birinshi oqylymda qabyldaýdy usynǵan bolatyn.

Atalǵan zań jobasy RF Qylmystyq kodeksiniń 28-taraýyn — «Kompıýterlik aqparat salasyndaǵy qylmystardy» — 274(6)-bappen tolyqtyrady. Bul bap shetel azamaty nemese azamattyǵy joq adammen jasalatyn baılanys qyzmetterin kórsetý týraly shartqa paıdalanýshy jabdyǵynyń (mysaly, mobıldi telefonnyń IMEI-nómiri) sáıkestendirý derekterin engizý mindetin oryndamaǵany úshin jaýapkershilikti kózdeıdi. Atalǵan SIM-karta sol shartta kórsetilgen qurylǵyda paıdalanylýy tıis.

Buǵan deıin Tsıfrlyq damý mınıstrliginde SIM-kartalardy endi qalaı satyp alýǵa bolatyny týraly aıtylǵan bolatyn.