Reseıde sheteldikter jasaǵan qylmys 40% azaıdy
MÁSKEÝ. KAZINFORM — Reseıge jyl saıyn túrli maqsatpen shamamen 9 mln sheteldik keledi. Bul týraly RF Іshki ister mınıstriniń birinshi orynbasary, kóshi-qon qyzmetiniń basshysy Andreı Kıkot Reseı prezıdenti Vladımır Pýtınmen kezdesýde málimdedi, dep habarlaıdy agenttik tilshisi Kremldiń baspasóz qyzmetine silteme jasap.
Kıkottiń aıtýynsha, Reseıde bir mezette 6-6,5 mln sheteldik bolady. Onyń ishinde shamamen 3 mln adam — eńbek mıgranty, 1,7 mln — olardyń otbasy múshesi, taǵy 1 mln-ǵa jýyǵy — týrıst, stýdent jáne jeke maqsatpen kelgen azamat.
Sonymen qatar elde júrgen sheteldikterdiń shamamen 800 myńy zań talaptaryn, onyń ishinde kóshi-qon zańnamasyn buzǵan.
Kıkot zańdy eńbek kóshi-qonynyń ósip kele jatqanyn aıtty. Onyń sózinshe, keıingi ýaqytta zańdy eńbek mıgranttarynyń úlesi 45%-dan 50%-ǵa deıin artqan.
RF ІІM basshysynyń orynbasary mıgranttardyń jumys istemeıtin otbasy músheleriniń sanyn qysqartý sharalary týraly da aıtty. Memlekettik kóshi-qon saıasaty tujyrymdamasyn iske asyrý aıasynda olardyń sany 1,7 mln adammen salystyrǵanda 20%-ǵa qysqarǵan. Buǵan, atap aıtqanda, úkimettiń sheteldik azamattardyń balalaryn mektepke qabyldaý kezinde belgilegen talaptary yqpal etken.
Sonymen qatar 2027 jylǵy 1 qańtardan bastap Reseıde jumys isteıtin sheteldikterge elde turatyn árbir jumys istemeıtin otbasy múshesi úshin salyq salýdy kózdeıtin federaldyq zań kúshine enedi.
ІІM málimetinshe, shetel azamattary arasyndaǵy qylmys deńgeıi de tómendep keledi. Byltyr sheteldikter jasaǵan shamamen 41 myń qylmys tirkelse, bıylǵy birinshi jartyjyldyqta bul kórsetkish 14,5 myń bolǵan. Bul byltyrǵymen salystyrǵanda 40% az.
Kıkot bul dınamıkany kóshi-qon qyzmetiniń ókiletteriniń keńeıýimen baılanystyrdy. Vedomstvo uıymdasqan qylmystyq toptardy, zańsyz kóshi-qon shemalary men arnalarynyń jolyn kesýge, sondaı-aq eńbek mıgranttaryn tirkeý jáne zańdastyrý úshin jalǵan qujattar daıyndaıtyn astyrtyn baspahanalardy anyqtaýǵa basymdyq berip otyr. Anyqtalǵan uıymdasqan qylmystyq toptardyń sany 30% artqan.
Shetel azamattarynyń qatysýymen jasalatyn qylmystardyń basym bóligi Máskeý, Máskeý oblysy jáne Sankt-Peterbýrg qalasyna tıesili. Bul óńirlerde barlyq tirkelgen qylmystyń jartysyna jýyǵy jasalady, qalǵany Reseıdiń basqa sýbektileri arasynda bólingen.
Kóshi-qondy baqylaý salasynda da tekserý sharalarynyń sany artqan. Júrgizilgen reıdter sany 155 myńǵa kóbeıip, tekserilgen zańdy tulǵalar sany 43% ósken. Nátıjesinde shamamen 100 myń sheteldik elden shyǵarylǵan, onyń ishinde 75 myńy májbúrli túrde deportatsııalanǵan.
Buǵan deıin Qazaqstanda adam saýdasynyń 85 faktisi men zańsyz kóshi-qonnyń 9 arnasynyń joly kesilgeni týraly jazǵanbyz.
