Reseıde shetelden dári ákelý erejeleri ózgeredi
MÁSKEÝ.Kazinform — Reseıde medıtsınalyq maqsatta qoldanylatyn dárilik preparattardy elge ákelý tártibin ózgertý josparlanyp otyr. Tıisti qaýly jobasyn RF Densaýlyq saqtaý mınıstrligi ázirledi, dep habarlaıdy agenttik tilshisi.
Qujat qoǵamdyq talqylaýǵa shyǵarylǵan. Ol 2021 jylǵy 1 maýsymdaǵy Úkimettiń № 853 qaýlysymen bekitilgen qoldanystaǵy erejelerdiń ornyna engizilýi tıis. Jańa normalardy 2027 jylǵy 1 qyrkúıekten bastap 2033 jylǵy 1 qyrkúıekke deıin qoldaný usynylyp otyr.
Ózgeristerdiń biri Reseıde tirkelmegen, medıtsınalyq buıymdar óndirý úshin ákelinetin dári-dármekterge qatysty. Bul maqsatta Densaýlyq saqtaý mınıstrliginiń qorytyndysyn alý qajet bolmaıdy. Onyń ornyna óndirýshige preparattyń medıtsınalyq buıymdar óndirýge arnalǵanyn rastaıtyn Roszdravnadzordyń qujatyn alý qajet bolady. Vedomstvo qujattardy 10 jumys kúni ishinde qaraýy tıis, al rastaý bir jyl boıy jaramdy bolady.
Densaýlyq saqtaý mınıstrligi dári-dármekti elge ákelýge qorytyndy berýden bas tartý negizderiniń tizbesin de keńeıtýdi usynady. Atap aıtqanda, ótinish berýshi týraly málimetter Zańdy tulǵalardyń biryńǵaı memlekettik tiziliminde (EGRıÝL) bolmaǵan jaǵdaıda bas tartylýy múmkin. Sondaı-aq dárigerlik komıssııanyń sheshimi qaıta usynylǵan kezde, eger preparattyń kórsetilgen búkil kólemine qorytyndy buryn berilgen bolsa, bas tartýǵa jol beriledi. Ómir boıy qoldanýǵa taǵaıyndalǵan dári-dármekter bul talaptan tys bolady.
Ómirlik kórsetilimder boıynsha naqty patsıentterge Reseıde tirkelmegen preparattardy ákelý kezinde dárigerlik komıssııa qujattaryna qoıylatyn talaptar da ózgeredi. Jobaǵa sáıkes, hattamaǵa dárigerlik komıssııanyń tóraǵasy qol qoıýy tıis. Qazir qujatqa medıtsınalyq uıymnyń basshysy qol qoıady.
Sonymen qatar dárigerlik komıssııa sheshimin qaıta paıdalanýdyń tártibin ózgertý usynylady. Ómir boıy qoldanýǵa taǵaıyndalǵan preparattarǵa qatysty erekshelik saqtalady. Al qoldanystaǵy erejelerde mundaı erekshelik uzaq merzimdi emdeýde qoldanylatyn dári-dármekterge de qatysty.
Joba boıynsha túpkilikti sheshim qoǵamdyq talqylaý rásimi aıaqtalǵannan keıin qabyldanady.
Buǵan deıin Qazaqstannyń dári-dármek ımportyna táýeldilikti qalaı azaıtyp jatqany týraly jazǵan bolatynbyz.
Qazaqstan dári-dármek ımportyna táýeldilikti qalaı azaıtyp jatyr.
